Qalanyń komýnaldyq turǵyn úı qorynan turǵyn úı kezeginde turǵan kópbalaly otbasylarǵa 227 úsh bólmeli páter bólindi.
Almaty qalasynyń ákimi Baqytjan Saǵyntaev Naýryzbaı aýdanynyń «Alma Sıtı-5» turǵyn úı kesheninen úsh bólmeli páterlerdi alǵan jańa qonystanýshylardy quttyqtady. Úıler «Nurly jer» memlekettik baǵdarlamasy aıasynda salynǵan, dep habarlaıdy Almaty-akshamy.kz.
Jańa qonystanýshylardy quttyqtaı otyryp, megapolıs ákimi B. Saǵyntaev qala turǵyndaryna áleýmettik qamqorlyq ákimdik jumysynyń basty baǵyty ekenin aıtty. Jyl basynan beri 2 340 muqtaj otbasyǵa jeńildikpen nesıe berý aıasynda turǵyn úı berildi. Sonyń ishinde komýnaldyq turǵyn úı qorynan - 41; «Baqytty otbasy» respýblıkalyq baǵdarlamasy aıasynda kóp balaly, tolyq emes otbasylar men múgedek balalardy tárbıelep otyrǵan otbasylarǵa 181 nesıelik zaem berildi.
Bul rette Almaty qalasynyń ákimi B. Saǵyntaevtyń bastamasymen kóp balaly otbasylarǵa beriletin nesıe sanyn kóbeıtý maqsatynda jergilikti búdjetten kezekte turǵandarǵa jeńildetilgen nesıelerdi qosymsha qarjylandyrýǵa 3,3 mlrd teńge bólindi. Bul shara taǵy 223 nesıe berýge múmkindik beredi. Barlyǵy «Baqytty otbasy» baǵdarlamasy aıasynda 1 013 otbasyn baspanamen qamtamasyz etý josparlanýda.
«Shańyraq» respýblıkalyq baǵdarlamasy (5-10-20) aıasynda 2021 jyly 1 310 nesıelik zaem berildi. Jumys isteıtin jastarǵa 1050 jalǵa beriletin páter bólindi. Búginde «Almaty jastary» qalalyq jeńildetilgen nesıelendirý baǵdarlamasy boıynsha 772 nesıelik zaem berildi. Jyl sońyna deıin qamtý keminde 1 000 nesıelik zaemdy quraıtyn bolady.
Sonymen qatar, Almaty qalasynyń ákimi B. Saǵyntaevtyń tapsyrmasy boıynsha, alǵashqy tólemniń bir bóligin qamtamasyz etýge járdemdesý úshin 1 mıllıon teńge somasyndaǵy turǵyn úı sertıfıkattary áleýmettik kómek túrinde óteýsiz jáne qaıtarymsyz negizde beriledi. Bul úshin jergilikti búdjetten 2 mlrd teńge bólindi. Qalanyń kezekte turǵan turǵyn úı sertıfıkatyn alýshylar - 1 jáne 2 toptaǵy múgedekter; múgedek balalary bar nemese tárbıelep otyrǵan otbasylar; jetim balalar men ata-anasynyń qamqorlyǵynsyz qalǵan balalar; kópbalaly otbasylar.
