Jekemenshik mektepter tegin oqýlyqpen qamtamasyz etiledi - Asqat Aımaǵambetov
Búgin Almatyda «Bilimdi ult: bilimge umtylý, eńbeksúıgishtik jáne patrıotızm» atty forým ótip jatyr, dep habarlaıdy Almaty-akshamy.kz QazAqparatqa silteme jasap.
Oǵan 23 myń ustaz qatysyp jatyr.
Dástúrli jıynǵa Oqý-aǵartý mınıstri Asqat Aımaǵambetov, Almaty qalasynyń ákimi Erbolat Dosaev, Sıngapýr muǵalimder odaǵynyń Bas hatshysy Maık Tırýman, Helsınkı qalasy bilim departamentiniń qyzmetterdi damytý bóliminiń basshysy Mare Kıllonen, bilim berý salasyndaǵy qazaqstandyq jáne sheteldik sarapshylar, muǵalimder jáne ata-analar qaýymdastyǵynyń 23 myńnan astam ókili qatysyp jatyr.
Forýmnyń maqsaty – bilim berý sapasyn arttyrý boıynsha naqty keısterdi talqylaý úshin dıalog alańyn usyný, qalanyń bilim berý jumysynyń júıesin jaqsartý úshin praktıkalyq tájirıbemen almasý. Almaty ákimi Erbolat Dosevtyń aıtýynsha, búgingi kúni jekemenshik mektepterdiń áleýeti zor.
«Búgingi tańda balalardyń talantyn damytýǵa múmkindik týdy. Almaty qalasynda shyǵarmashylyqqa, sıfrly tehnologıaǵa, ınovasıaǵa baǵyttalǵan mektepter bar. Olardyń nátıjesi óte jaqsy. Jańa oqý jylynda eki jekemenshik mektep ashylady. Mysaly, Máskeýde mektepterdiń úshten bir bóligi - jekemenshik. Almatyda da solaı bolý kerek dep oılaımyn. Sapaly bilim - jas urpaqtyń bolashaǵy»,- dedi Erbolat Dosaev.
Oqý-aǵartý mınıstri Asqat Aımaǵambetov aldaǵy ýaqytta jekemenshik mektepter tegin oqýlyqpen qamtamasyz etiletinin aıtty.
«Qazir jekemenshik mektepterdiń basym bóligi qosymsha qarjy almaıdy, sebebi jekemenshik bilim orshaqtaryna jan basyna shaqqandaǵy qarjylandyrý júıesi engizilgen. Sondyqtan atalǵan mektepter oqýlyqpen qamtamasyz etilýi tıis. Sonymen qatar, kýrs máselesi týyndap otyr. Mınıstrlik aldaǵy ýaqytta tıimdi sheshim qabyldaıtyn bolady»,- dedi mınıstr.
Sondaı-aq otyrys barysynda aldaǵy oqý jylynda qala mektepterinde bilim berý sapasyn arttyrý joldary talqylandy.