Almaty ákimi Darhan Satybaldy Memleket basshysynyń tapsyrmasy aıasynda júzege asyrylyp jatqan iri ǵylymı-bilim berý jobalarynyń biri — Almatydaǵy Balalar ǵylymı mýzeıiniń qurylys barysymen tanysty. Joba Sıngapýr Ǵylym ortalyǵy jáne mýzeılik sheshimder ázirleý salasynda tájirıbesi mol Kingsmen Exhibit PTE LTD kompanıasymen birlesip júzege asyrylyp jatyr.
Bul bastama Qazaqstandaǵy alǵashqy ınteraktıvti keńistik bolmaq. Ol balalardyń ǵylym, tehnologıa, ınjenerıa jáne matematıka salalaryna (STEM) degen qyzyǵýshylyǵyn erte jastan damytýǵa baǵyttalǵan.
Qazir nysanda buzý jumystary aıaqtalyp, tehnıkalyq saraptamanyń qorytyndysyna saı qurylymdardy kúsheıtý jumystary bastaldy. Qurylys barysyn Almaty qalasy ákimdiginiń salalyq basqarmalary men bilim berý, sondaı-aq ESG-ıntegrasıa salalaryndaǵy halyqaralyq sarapshylar birlese qadaǵalap otyr.
Sıngapýr Ulttyq ǵylym akademıasynyń prezıdenti, Sıngapýr Ǵylym ortalyǵynyń bas dırektory, doktor Tıt Meng Lımmen ótken jumys kezdesýi barysynda jobany júzege asyrý barysy keńinen talqylandy. Áńgime aıasynda sıngapýrlyq mýzeıdi basqarý modelin beıimdeý jáne osy salada bilikti mamandar daıarlaý jaıy qozǵaldy. Doktor Lım joba komandasyn oqytý men ozyq ádistemelerdi engizý turǵysynan jan-jaqty qoldaý kórsetýge ázir ekenin bildirdi.
Jobada ınklúzıvtilik máselesine aıryqsha mán berilgen: erekshe bilim berý qajettiligi bar balalarǵa jaıly jaǵdaı jasalady. Atap aıtqanda, aýtızmmen aýyratyn balalar úshin arnaıy bólme jabdyqtalady.
«Biz Almatyda jaı mýzeı emes, balalardyń ǵylymmen erkin tildese alatyn, tanymdyq qyzyǵýshylyǵyn oıatyp, zertteýshilik qabiletin keńistik quryp jatyrmyz. Bul ulttyń zıatkerlik bolashaǵyn qalyptastyrý jolyndaǵy mańyzdy qadam», - dedi Darhan Satybaldy.
Qala ákimi jobanyń sapaly ári merziminde oryndalýyn tapsyrdy. Sonymen qatar Balalar ǵylymı mýzeıin qalanyń mektepke deıingi jáne bastaýysh bilim berý júıesine úılesimdi biriktirýdiń mańyzyn aıtty. Mýzeı 2026 jyly ashylady.