Atalǵan týyndy sońǵy ret osydan bes jyl buryn qoıylǵan
Bul joly óner týyndysyn jańa qyrynan tanytty, dep habarlaıdy Almaty-akshamy.kz
Eki aktiden turatyn spektalde adaldyq pen jaýyzdyq, mahabbat pen satqyndyq kúresi kórinis tabady.
«Ómir eshqashan bir tústi bolǵan emes, árqashan túrli reńkke ıe, ómirde adaldyq pen mahabbat ta, satqyndyq pen zulymdyq ta kezdesedi. Bul balette barlyǵy kórinis tapqan. Aqqý – tazalyqtyń, náziktiktiń nyshany, lırıkalyq beıne», – deıdi balettiń jetekshi solısi Aınur Muqasheva.
Aıta keteıik, tańdaı qaqtyrar bul týyndyny Petr Chaıkovskıı 1877 jyly jazǵan. Sol ýaqyttan beri álemdik deńgeıdegi horeografıalyq klasıkanyń jaýharyna aınalǵan kompozısıa túrli nusqada kópshilik kórermenniń nazaryna usynylyp keledi. Bekzat ónerdi tamashalýǵa kelgenderdiń sany kóp boldy. Sahna dekorasıasy, sýretshiniń shyǵarmashylyq izdenisi men qoıylym talǵamy bıik kórermendi tánti etpeı qoımady.
«Bolat Ǵazızulynyń nusqasymen qoıylǵan bul týyndynyń ózgelerden ereksheligi – dınamıkasynda. Araǵa 5 jyl salyp, qaıta sahnalaýymyzdyń sebebi – qoıylymdy oryndaý úshin bastapqyda balet ártisteri jetispedi. Biz naǵyz talanttardy izdedik. Joǵary deńgeıde jumys istedik. Osylaısha, kórermen kásibı túrde daıyndalǵan jumystyń kýási boldy», – deıdi balettiń kórkemdik jetekshisi Dıar Aqenev.