Jazda moped jáne elektrosamokat júrgizýshileriniń jol erejelerin buzý oqıǵalary artqan
Almatyda mobıldi kólik túrlerin paıdalanatyn adamdardyń jol erejelerin buzý derekterin anyqtaý jumystary kúsheıtildi. Bul týraly Almaty qalalyq polısıa departamentiniń jergilikti polısıa qyzmeti basqarmasynyń bastyǵy Erjan Uzabaev málim etti, dep habarlaıdy Almaty-akshamy.kz QazAqparatqa silteme jasap.
«Máselen, Almatyda aldyn alý is-sharasynyń bir kúninde moped júrgizýshileri 114 ret jol erejesin buzǵan. Quqyq buzýshylar ÁQBtK-niń 615-baby 1-bóligi boıynsha ákimshilik jaýapkershilikke tartyldy. Aıyppuldyń jalpy somasy 698 364 teńgeni qurady», – dedi ol.
Sondaı-aq ol jaz mezgilinde Almatyda moped jáne elektrosamokat júrgizýshileriniń jol erejelerin buzý oqıǵalary artqanyn habarlady.
«Statısıkalyq málimetter boıynsha Almatyda mobıldi kólikterdiń qatysýymen jol apattarynyń sany 4 ese ósken. Bıylǵy jyldyń 6 aıynda moped jáne elektrosamokattardyń qatysýymen 77 jol apaty bolyp, saldarynan 81 adam jaraqat alyp, bireýi qaıtys boldy. Sondaı-aq, samokat pen skýterde balalardyń qatysýymen 21 jol apaty tirkelip, odan 23 bala jaraqat aldy», - dedi ol.