Mektepke deıingi bilim berý Almatynyń áleýmettik salasyn damytýdyń basym baǵyttarynyń biri bolyp qala beredi.
Balabaqsha jelisin keńeıtý, kórsetiletin qyzmettiń sapasyn arttyrý jáne ınfraqurylymdy jańǵyrtý júıeli taldaýdy ári josparlardy úılestirýdi talap etedi, - dep habarlaıdy Aqshamnews.kz.
Bul máseleler Almaty qalasy ákiminiń orynbasary Abzal Núkenovtiń tóraǵalyǵymen Oqýshylar saraıynda ótken keńeıtilgen otyrysta qaraldy. Jıyn aıasynda jańartylǵan derekter usynylyp, 2026 jylǵa arnalǵan salany damytý basymdyqtary aıqyndaldy.
Almaty qalasynyń Bilim basqarmasynyń málimetinshe, búginde qalada 1 066 mektepke deıingi uıym jumys isteıdi. Onda 84 766 bala tárbıelenýde. Eki jastan alty jasqa deıingi balalardy qamtý deńgeıi 98 paıyzǵa jetken.
«Kezekti qysqartýǵa baǵyttalǵan pılottyq jobanyń tıimdiligi dáleldenip otyr: 2026 jylǵy 1 shildege qaraı kezek 40 myń balany quraýǵa tıis, al jeltoqsan aıyna deıin 14 636 balaǵa deıin qysqarady», – dedi qalalyq Bilim basqarmasy basshysynyń orynbasary Bıbigúl Malǵajdarova.
Jıynda ınklúzıvti bilim berý men kadrlyq qamtamasyz etý máseleleri de jeke qaraldy. Qazirgi tańda 117 memlekettik balabaqshada erekshe bilim berý qajettiligi bar balalarǵa qoldaý kórsetetin mamandar jumys isteıdi. Bıbigúl Malǵajdarovanyń aıtýynsha, ınfraqurylymdy jańǵyrtý, pedagogterdiń biliktiligin arttyrý jáne qaýipsizdik sharalaryn kúsheıtý – atalǵan qurylym úshin aldaǵy jylǵa negizgi mindetterdiń biri bolyp qala beredi.
Otyrys aıasynda qaladaǵy sanıtarlyq-epıdemıologıalyq baqylaý departamenti júrgizgen tekserý nátıjeleri de aıtyldy. Anyqtalǵan buzýshylyqtar sanıtarlyq talaptardyń saqtalýyna, úı-jaılardyń jaǵdaıyna, tamaqtanýdy uıymdastyrý sharttaryna jáne óndiristik baqylaýdyń júrgizilýine qatysty bolǵan.
«Tekserý nátıjeleri mektepke deıingi uıymdardyń barlyǵy birdeı belgilengen normatıvterge saı jaǵdaı jasaı bermeıtinin kórsetti. Bizdiń mindet – buzýshylyqtardy tirkeýmen shektelmeı, olardyń tolyq joıylýyna qol jetkizý», – dedi departament basshysynyń sanıtarlyq-gıgıenalyq máseleler jónindegi orynbasary Gaýhar Katkenova.
Onyń aıtýynsha, jeke jáne memlekettik balabaqshalarmen profılaktıkalyq jumys, sonyń ishinde sanıtarlyq qorǵaý deńgeıin arttyrý baǵytynda, kúsheıtilip jatyr.
Jıynda órt qaýipsizdigi máseleleri de kóterildi. Bir jyl ishinde 144 balabaqsha tekserilip, nátıjesinde shamamen 2 myń buzýshylyq anyqtalǵan. Olardyń qatarynda habarlaý júıesiniń talapqa saı bolmaýy, evakýasıa joldaryn uıymdastyrýdaǵy kemshilik jáne órtke qarsy sý júıeleriniń jetkiliksiz jaramdylyǵy bar. Ákimshilik aıyppuldardyń jalpy somasy 6,6 mln teńgege jetti.
Otyrysty qorytyndylaı kele, Almaty qalasy ákiminiń orynbasary Abzal Núkenov usynylǵan derekter mektepke deıingi bilim berý salasyn júıeli túrde jańartýdyń qajettiligin aıqyn kórsetip otyrǵanyn atap ótti. Ol bilim berý sapasyna baqylaýdy kúsheıtýge, kadrlyq máselelerdi jedel sheshýge, balabaqsha basshylarynyń jeke jaýapkershiligin arttyrýǵa jáne ınfraqurylymdyq josparlardyń múltiksiz oryndalýyna erekshe nazar aýdardy. Sondaı-aq, vedomstvoaralyq ózara is-qımyldy nyǵaıtyp, balalardy qabyldaý men qaýipsizdigine qatysty barlyq rásimderdiń ashyqtyǵyn qamtamasyz etýdi, anyqtalǵan máseleler men 2026 jylǵa belgilengen basymdyqtardy eskere otyryp, jańartylǵan is-sharalar josparyn usynýdy tapsyrdy.