Ortalyq memlekettik arhıvinde Keńes Odaǵynyń Batyry, Qazaqstannyń Halyq qaharmany, jazýshy Baýyrjan Momyshulyna arnalǵan respýblıkalyq ǵylymı-praktıkalyq konferensıa ótti.
Jıynǵa «Halyq batyry – Baýyrjan Momyshulynyń tarıhı tulǵasy men rýhanı murasy arqyly jastardy patrıotızmge tárbıeleýdiń ózekti máseleleri» taqyryby qoıyldy.
QR Ortalyq memlekettik arhıviniń dırektory Sábıt Shildebaı is-shara Qazaqstan Respýblıkasynyń Prezıdenti Qasym-Jomart Toqaevtyń 2025 jyldyń 25 jeltoqsanyndaǵy Jarlyǵymen Baýyrjan Momyshulyna «Halyq qaharmany» ataǵyn berilýine oraı uıymdastyrylǵanyn atap ótti. Onyń aıtýynsha, konferensıa maqsaty – Baýyrjan Momyshulynyń tarıhı tulǵasy men rýhanı murasy arqyly jastardy patrıotızm men otanshyldyqqa tárbıeleýdiń ózekti máselelerin talqylaý.
Al QR Prezıdentiniń keńesshisi Málik Otarbaev Baýyrjan Momyshulyna «Halyq Qaharmany» ataǵynyń berilýi — tarıhı ádildiktiń saltanat qurýy ekenin aıtty.
- Baýyrjan Momyshuly tek Uly Otan soǵysynyń qaharmany ǵana emes, qazaq halqynyń rýhyn, ulttyq namysyn, áskerı aryn búkil álemge tanytqan biregeı tulǵa. Keńes dáýirinde onyń erligine kúmán bolǵan joq. Ásirese, 1941 jyly Máskeýdi qorǵaý kezindegi janqıarlyq shaıqastarda ózi bastaǵan batalónmen jaý tylyna 27 ret arnaıy tapsyrmalardy oryndaý úshin enip, kúrdeli áskerı operasıalardy sátti júzege asyrdy. Sondaı-aq, osy erligi 316-atqyshtar dıvızıasynyń 8-gvardıalyq dıvızıaǵa aınalýyna negiz boldy. Bul erlik arhıv derekterimen de tolyq rastaldy. Biraq mineziniń tik, shynshyl, joǵary shendi qolbasshylarmen jáne bılikke jaǵynbaıtyn qaısarlyǵynyń saldarynan laıyqty joǵary marapat der kezinde berilmedi. Sondyqtan Memleket basshysynyń marapaty tek jeke adamǵa emes, tutas halyqtyń maqtanyshyna, adal eńbegi men tereń erligine berilgen ádil baǵa boldy, - dedi ol.
İs-shara barysynda qatysýshylar Baýyrjan Momyshulynyń murasy arqyly jastardy tárbıeleýdiń ǵylymı, pedagogıkalyq, áskerı jáne ádebı máseleleri, sondaı-aq tarıhı tulǵanyń áskerı strategıasy men taktıkasyn, soǵys psıhologıasy ilimin áskerı oqý oryndarynyń barlyq satysynda oqytý men ony qoldaný aıasyn keńeıtý máseleleri talqylady.