«Ádil sóz» halyqaralyq qorynyń prezıdenti Qarlyǵash Jamanqulova Qazaqstannyń jańa Konstıtýsıasynda sóz bostandyǵy men shyǵarmashylyq erkindikti qorǵaý normalarynyń bekitilýin joǵary baǵalady. Óz pikirin ol Konstıtýsıalyq reforma jónindegi komısıanyń besinshi otyrysynda bildirdi.
Qarlyǵash Jamanqulovanyń aıtýynsha, sóz bostandyǵy azamattarǵa ómirlik mańyzy bar sheshimder qabyldaý úshin qajetti obektıvti, tolyq jáne shynaıy aqparatty ýaqtyly alýǵa múmkindik beredi jáne sonymen qatar memleketti júıeli qatelikterden qorǵaıtyn qural retinde qarastyrylýy múmkin.
«Sóz bostandyǵy Konstıtýsıa preambýlasynyń jańa redaksıasynda jarıalanǵan quqyqtyń ústemdigi men «Zań men Tártip» qaǵıdatyn saqtaýdyń rásimdik shartyna aınalady», – dedi ol.
«Ádil sóz» qorynyń prezıdenti sóz bostandyǵyn qorǵaýmen qatar Konstıtýsıanyń jańa redaksıasy shyǵarmashylyq erkindikti de qorǵaıtynyn jáne bul uǵymdardy ǵylymı, tehnıkalyq jáne kórkem shyǵarmashylyqtyń barlyq túrlerin qamtı otyryp keńeıtetinin atap ótti.
«Bul kepildikter zıatkerlik menshikti qorǵaýmen qatar júrýi tıis. Bul ásirese sıfrlyq dáýirde asa mańyzdy», – dedi Qarlyǵash Jamanqulova.
Onyń aıtýynsha, azamattarǵa aqparat alý jáne taratý quqyǵy beriledi, alaıda bul quqyq basqa adamdardyń quqyqtary men qadir-qasıetine, qoǵamdyq moral men qoǵamdyq tártipke nuqsan keltirilmeýi tıis.
«Mundaı shekteýler Konstıtýsıa men halyqaralyq quqyqta tanylǵan maqsattar úshin ǵana jol beriledi, ıaǵnı bulyńǵyr ári ekiushty túsindirmesiz. Senzýraǵa tyıym salynatynyn erekshe atap ótkim keledi», – dedi ol.
Sondaı-aq, Qarlyǵash Jamanqulova Konstıtýsıada qoǵamnyń rýhanı-adamgershilik qundylyqtaryna qatysty uǵymdardyń bekitilýi týraly pikir bildirdi. Onyń aıtýynsha, áńgime tek zańdarda tikeleı bekitilgen nysandar jaıynda bolýy tıis. Bul quqyqtyq belgisizdiktiń aldyn alýǵa múmkindik beredi.
«Sóz bostandyǵyn, oı men shyǵarmashylyq erkindikti Konstıtýsıa deńgeıinde kepildendirilgen túrde qamtamasyz etý qazaqstandyq qoǵamnyń órkendeýiniń berik negizi», – dedi ol.