Konstıtýsıalyq reforma jónindegi komısıa otyrysynda Qazaqstan Respýblıkasy Parlamenti Májilisiniń depýtaty, «Aýyl» partıasy fraksıasynyń jetekshisi Serik Egizbaev reformanyń negizin quraıtyn úsh strategıalyq tirekti belgilep berdi.
Eń aldymen, depýtattyń pikirinshe, jańa konstıtýsıalyq redaksıaǵa sáıkes, Quryltaıdyń zań shyǵarýshy bılikti júzege asyratyn eń joǵary ókildi organ bolyp bekitilgeni – bul zań shyǵarý prosesindegi artyq búrokratıany, palatalar arasyndaǵy uzaq kelisimder men kedergilerdi joıady jáne halyqtyń bılikke tikeleı qatysýyn qamtamasyz etedi.
«Konstıtýsıa boıynsha memlekettik bıliktiń birden-bir bastaýy - halyq. Bul degenimiz - Quryltaı jaı ǵana zań qabyldaýshy mekeme emes, ol - halyqtyń bılikke tikeleı qatysýyn qamtamasyz etetin, egemendigimizdiń sımvolyna aınalatyn eń joǵary legıtımdi organ degen sóz. Bılikke eshkimniń qol suǵýyna jol bermeıtin bul konstıtýsıalyq norma - memlekettiligimizdiń myzǵymas kepili. Quryltaı zańnyń jobalanýynan bastap onyń qabyldanyp, kúshine enýine deıin - basynan aıaǵyna deıin tolyq jaýapkershilikti óz moınyna alady», – dedi ol.
Sonymen qatar, Serik Egizbaevtyń pikirinshe, partıalyq tizim - kásibılik pen saıası mádenıettiń kepili.
«Strategıalyq mańyzy bar taǵy bir sheshim - Quryltaıdyń proporsıonaldy negizde, ıaǵnı partıalyq tizimder arqyly jasaqtalýy. Bul - elimizdiń saıası mádenıetin múldem jańa bıikke kóteredi. Partıalyq tizim – Quryltaıdyń ıntellektýaldyq áleýetin qamtamasyz etetin negizgi tetik. Bul júıe arqyly biz Parlamentke qoǵamnyń barlyq tobyn, ásirese aýyl mamandaryn, bilimdi jastar men belsendi áıelderdi tartamyz», – dep aıtty Májilis depýtaty.
Al Halyq Keńesine kelgende ol bul organnyń quzyreti burynǵy Qazaqstan halqy Assambleıasy ıe bolǵan múmkindikterden áldeqaıda keń jáne pármendi ekenin jetkizdi.
«Halyq Keńesiniń fýnksıalary endi ýaqytsha erejeler nemese jarlyqtar emes, Ata Zańnyń ajyramas bóligine aınaldy. Olar - myzǵymas, eshkimniń erkimen ózgermeıtin, konstıtýsıalyq turǵydan qorǵalǵan quqyqtar. Bul - Halyq Keńesiniń memlekettik ıerarhıadaǵy ornyn bekemdeıdi. Halyq Keńesi- Quryltaıǵa tikeleı zań jobalaryn engizýge jáne eń mańyzdy memlekettik máseleler boıynsha referendým bastamasyn kóterýge quqyly. «Aýyl» partıasy halyq júktegen osy tarıhı reformalardy júzege asyrý úshin óziniń barlyq kásibı áleýetin jumsaýǵa daıyn. Biz aýyldaǵy aǵaıynnyń senimine adal bolyp, el úmitin ispen aqtaýdy basty boryshymyz dep bilemiz», – dep, ol óz sózin qorytyndylady.