Májilis depýtaty Danıa Espaeva Konstıtýsıalyq reformalar jónindegi komısıanyń besinshi otyrysynda Ata Zańǵa usynylǵan ózgeristerdiń kólemi men tereńdigi tek qana jekelegen túzetýler aıasynda qalmaıtynyn, Konstıtýsıanyń jańa mátinin ázirleý qajettigine obektıvti túrde alyp keletinin aıtty.
Onyń sózinshe, bastapqydaǵy parlamenttik reforma týraly bastama, sondaı-aq qoǵamdyq qatynastardyń transformasıasy, sıfrlandyrý men jasandy ıntellektiniń damýy Ata Zańdy keshendi túrde qaıta qaraýdy talap etedi. Komısıaǵa eki myńnan astam usynys kelip tústi, olar qazirgi konstıtýsıalyq normalardyń jartysynan astamyn qamtıdy, bul tek jekelegen baptardy jańartý emes, memlekettiń basqarý qurylymynyń arhıtektýrasyn qaıta qaraý qajettiligin kórsetedi.
«Qazir aldymyzda Ata Zańnyń jekelegen bólimderin túzetý nemese tolyqtyrýdan asyp túsetin mindet tur. Bul — memlekettik basqarý júıesiniń, quqyqtar men bostandyqtardyń kepildikteriniń jáne bılik pen qoǵam arasyndaǵy ózara yqpaldastyq tetikterin tereń qaıta qaraý», — dedi Danıa Espaeva.
Ol sondaı-aq bul tásil quqyqtyq aktiler týraly zańnama talaptaryna saı ekenin atap ótti: normatıvtik qujat mátininiń jartysynan astamy ózgergen jaǵdaıda onyń jańa redaksıasy qabyldanýy tıis. Osy logıka boıynsha, jańa Konstıtýsıany ázirleý zańǵa negizdelgen qadam bolyp tabylady.
«Jańa Konstıtýsıa memlekettiń turaqty damýy úshin berik quqyqtyq negiz bolýǵa tıis. Bul Qazaqstannyń memlekettiliktiń jańa kezeńine qadam basyp otyrǵanynyń ashyq jarıalanǵan jaýaby bolady», — dep túıindedi Danıa Espaeva.