Ǵalymdar ózderi ashqan jańalyqtary týraly aıtyp, zertteý tájirıbesimen bólisedi
2022 jyldyń 12-13 sáýir aralyǵynda Almaty qalasynda Á.H. Marǵulan atyndaǵy arheologıa ınstıtýtynda Qazaq ǵylymynyń aptalyǵyna arnalǵan dástúrli «Marǵulan oqýlary – 2022» halyqaralyq ǵylymı-tájirıbelik konferensıasy ótedi, dep habarlaıdy Almaty-akshamy.kz.
Konferensıada 2021 jyly Qazaqstan aýmaǵynda jáne kórshiles memleketterde júrgizilgen arheologıalyq jumystardyń nátıjeleri talqylanady. Kórnekti ǵalymdar ózderiniń ashqan jańalyqtary týraly aıtyp, zertteý tájirıbesimen bólisedi, sondaı-aq ózekti ǵylymı máselelerdi talqylaıtyn bolady.
Konferensıa jumysy kelesi baǵyttar boıynsha júzege asyrylady: dalalyq arheologıalyq zertteýlerdiń nátıjeleri 2021 j.; tas dáýiriniń zertteýleri; erte metal dáýirin zertteýdiń jańa derekteri men nátıjeleri; eýrazıalyq mádenı keńistigi kontekstindegi erte kóshpeliler; orta ǵasyr kezeńindegi qala men dala; arheologıalyq zertteýlerdegi pánaralyq tásilder; arheologıalyq murany saqtaýdyń, konservasıalaýdyń jáne qalpyna keltirýdiń ózekti máseleleri, dalalyq zertteýlerdiń jańa tehnologıalar men zamanaýı qujattaý tásilderi.
Barlyǵy Qazaqstan, Reseı, Ázirbaıjan, Ózbekstan, Qyrǵyzstan, Belgıa, Italıa, AQSH jáne Ulybrıtanıa ǵalymdarynyń 100-den astam baıandamasyn jeke jáne qashyqtan tyńdaý josparlanýda.
Konferensıa aıasynda «Qazaqstannyń ótkenin zertteýdegi arheologıalyq jáne paleogenetıkalyq málimetterdi ıntegrasıalaý máseleleri» taqyrybynda dóńgelek ústel ótedi. Arheolog-mamandar men genetıkter birlesken zertteýlerdiń ózekti máselelerin, yntymaqtastyq baǵyttaryn, genetıkalyq zertteýlerdiń qazirgi jaǵdaıy jáne Respýblıkadaǵy damý perspektıvalaryn talqylaıdy.
Jalpy, konferensıa ǵylymı baılanystar ornatý, aqparat almasý jáne halyqaralyq yntymaqtastyqty nyǵaıtý alańyna aınalady.