2024 jyly ońtústik astanada mindetti áleýmettik medısınalyq saqtandyrý esebinen kórsetilgen qyzmetterge 97 mlrd teńgege jýyq qarjy jumsaldy. Bul týraly Óńirlik komýnıkasıalar qyzmetinde ótken brıfıńte Medısınalyq saqtandyrý qorynyń Almaty qalalyq fılıaly dırektory İlıas Muhamedjan málimdedi, dep habarlaıdy aqshamnews.kz
Aıtýynsha, jyl saıyn medısınalyq saqtandyrý esebinen kardıohırýrgıa, neırohırýrgıa, ýrologıa, travmatologıa, onkologıa, hırýrgıa jáne taǵy da basqa profılder boıynsha myńdaǵan operasıa jasalyp jatyr. Mundaı operasıalar kúrdeliligine baılanysty emhanalar men ǵylymı ortalyqtar deńgeıinde de jasalýy múmkin.
«Mysaly, 2024 jyly MÁMS arqyly 128 myńnan astam operasıa jasalyp, oǵan 79,1 mlrd teńge tólengen. Onyń ishinde joǵary tehnologıalardyń kómegimen jasalatyn operasıalar men manıpýlásıalarǵa Qor 14,7 mlrd teńge tóledi. Saqtandyrylmaǵan azamattar osyndaı operasıalardy jasatatyn bolsa qaltasynan birneshe mıllıon tólegen bolar edi», - dep atap ótti İlıas Muhamedjan.
2024 jyldyń 9 aıynda Almaty qalasynda 5200 kardıohırýrgıalyq operasıa, 3300 neırohırýrgıalyq ota, lor-profıli boıynsha 250 operasıa jasalǵan.
«Sońǵy kezde artroz, artrıt syndy býyn aýrýlarynyń kóbeıýine baılanysty tize, jambas býyndaryn almastyrýshylar sany kúrt artqany belgili. 2024 jyly almatylyq travmatologtar osyndaı 3500 operasıa jasaǵan. Oǵan MSQ 5,2 mlrd teńge tóledi», - dedi fılıal dırektory.
Sonymen qatar, aǵza almastyrý operasıalary da MÁMS arqyly qarjylandyrylady. 2023 jyly quny 551,8 mln teńgeden asatyn 83 transplantasıa jasaldy. Mundaı bir ǵana otanyń ózi orta eseppen alǵanda 7-9 mln teńge turady. Osy qyzmetterdiń bárin saqtandyrylǵan azamattar MÁMS arqyly qıyndyqsyz paıdalanyp keledi.