Jumysshy mamandyqtarynyń bedelin arttyrý, jastarǵa kásibı baǵdar berý, eńbekke baýlý jáne tájirıbelik daǵdylardy damytý maqsatynda uıymdastyrylǵan «Mamandyq álemi» atty kezekti sheberlik sabaq ótti, - dep habarlaıdy Aqshamnews.kz.
Shara «Jumysshy mamandyqtar jyly» aıasynda, Almaty qalasy İshki saıasat basqarmasynyń Qoǵamdyq damý ortalyǵynyń bastamasymen qolǵa alynǵan WORKSHOP «Eńbek pen sheberlik» jobasynyń jalǵasy retinde ótkizildi. Bul jerge qaladaǵy oqý oryndarynyń stýdentteri men oqýshylarynyń qatysýymen «Almaty jıhaz fabrıkasynda» uıymdastyryldy.
Fabrıkadaǵy sheberlik sabaǵy teorıadan góri is júzindegi bilim men tájirıbege basymdyq berdi. Kásiporynnyń jetekshi mamandary jastarǵa aǵash óńdeý, bólshekterdi dál ólsheý, buıym qurastyrý jáne sapany baqylaý sekildi naqty daǵdylardy kórsetti. Qatysýshylar óz qolymen shaǵyn buıymdar jasap, óz eńbeginiń nátıjesin kórýdiń qýanyshyn sezindi. Kásibı mamandardyń qasynda júrip, qural-jabdyqtarmen jumys isteýdi úırený, ár prosestiń mánin túsiný — jastar úshin jańa tájirıbe ǵana emes, óz qabiletin tanyp, bolashaq mamandyǵyna qyzyǵýshylyq oıatýdyń tıimdi joly boldy.
İs-shara barysynda qatysýshylar tek tyńdap qana qoımaı, suraq qoıyp, pikir almasyp, óz oılaryn ortaǵa saldy. Bul – ádettegi dáris emes, naqty ómirmen ushtasqan tájirıbelik dıalog alańy boldy. Kóptegen oqýshy óz bolashaǵy týraly oılanyp, eńbek naryǵyndaǵy suranysqa ıe salalarǵa qyzyǵýshylyq tanytty. Osyndaı formattaǵy sabaqtar jastardyń kásibı baǵdar alýyna jáne óz qabiletin tanýǵa naqty múmkindik beredi.
Joba eńbek adamynyń mártebesin arttyrýmen qatar, jas býynnyń boıyna tabandylyq, tózimdilik jáne eńbekqorlyq sıaqty qasıetterdi sińirýge baǵyttalǵan. Bul – eldiń óndiristik áleýetin arttyrýǵa, kadrlyq tapshylyqtyń aldyn alýǵa jáne «eńbek adamyn úlgi etý» ıdeıasyn qoǵam sanasyna sińirýge arnalǵan keshendi qadam.