Almatyda Qala kúninde «Kreatıvti kvartal» jańa jobasy iske qosyldy. Almaty qalasy kreatıvti ındýstrıa basqarmasynyń basshysy Qaısar Sarybaev Óńirlik komýnıkasıalar qyzmetiniń brıfıńinde onyń biregeıligi týraly aıtty, dep habarlaıdy almaty-akshamy.kz
Qaısar Sarybaevtyń aıtýynsha, «kreatıvti kvartal» Almatyda kóp fýnksıonaldy mádenı jáne iskerlik keńistikke aınalady.
«Bul - kreatıvti jáne shyǵarmashyl kásipkerlerdiń bıznes-ıdeıalaryn júzege asyrýǵa jaǵdaı jasaıtyn biregeı joba. Óner galereıalary, sán búrolary, qolónershilerdiń bazarlary úshin rezıdensıalardy uıymdastyrý, sheberlik sabaqtaryn ótkizý oryndary, shyǵarmashylyq ındýstrıalar men basqa da shyǵarmashylyq keńistikterdiń ónimderi men qyzmetterin jarnamalaý boıynsha is-sharalar uıymdastyrý josparlanýda», - dedi basqarma basshysy.
Bul jerde sondaı-aq kreatıvti kásipkerlikti qoldaý ortalyǵy men basqa da qyzmetter ornalastyrylady. Al «Almaty Creative Class» onlaın bilim berý platformasynyń iske qosylýy shyǵarmashylyq adamdarǵa óz talanty boıynsha aqsha tabýdy úırenýge, jańa baǵyttar men aralas mamandyqtardy ashýǵa múmkindik beredi.
Qaısar Sarybaev osyndaı basqa da jobalardy eske saldy. Máselen, Almatyda kreatıvti strategıany iske asyrý aıasynda 2020 jyldyń jeltoqsanynda Alataý aýdanynda Alatau Creative Hub ashyldy. Oǵan kovorkıng alańy, balalarǵa arnalǵan 25 tegin shyǵarmashylyq úıirme, sheberhana alańy kiredi. Jyl basynan beri kelýshilerdiń jalpy sany 100 myńnan astam adamǵa jetti. Mýzyka ónerine basa nazar aýdaratyn jastardyń Medeu Creative Hub ortalyǵyn ashý josparlanýda, DEPO Evolution Park qurylysy jalǵasýda, ıaǵnı kreatıvti ındýstrıalardyń jobalaryn iske asyrý úshin alań qurylatyn bolady.