Almatyda 5 myńnan astam kásipkerlik nysandy tólqujattaý qajet
Almatyda «Taza Qazaqstan» baǵdarlamasy jáne jańa kóriktendirý erejesi aıasynda qalalyq nysandardy tólqujattaý bastaldy, dep habarlaıdy aqshamnews.kz
Bul shara qala turǵyndary men qonaqtar úshin yńǵaıly, qaýipsiz jáne ekologıalyq taza orta qalyptastyrýǵa baǵyttalǵan qala strategıasynyń bir bóligi bolyp tabylady.
Tólqujattaýdyń negizgi mindeti – kásipkerlerge irgeles aýmaqtardy kóriktendirý boıynsha jaýapkershilik shegin anyqtaý. Almatynyń komýnaldyq ınfraqurylymdy damytý basqarmasynyń málimetinshe, barlyǵy 5 590 kásipkerlik nysandy tólqujattaý qajet. Qazir myńǵa jýyq kásipker tólqujatqa qol qoıdy. Tólqujattaý jumystary kelesi jyldyń sáýir aıynda aıaqtalady.
Bıznes qandaı nársege jaýapty?
Árbir bıznes sýbektisi kóriktendirý tólqujatyn alýǵa jáne irgeles aýmaqty tıisti jaǵdaıda ustaýǵa mindetti. Bul menshik nysanyna qaramastan barlyq qatysýshy úshin jaýapkershilik júkteıdi.
Aýmaqqa jaýapty sýbektilerge jeke jáne zańdy tulǵalar, PIK, MIB, QS, sondaı-aq ǵımarattardyń menshik ıeleri jáne jerdi ýaqytsha nemese turaqty paıdalaný quqyǵy bar tulǵalar jatady.
Tólqujat kásipkerlerdiń irgeles aýmaqtardy jáne nysandardyń qasbetin tıisti jaǵdaıda ustaý máselesindegi áleýmettik jaýapkershilikti arttyrady.
Ǵımarattardyń jáne qurylystardyń ıeleri qasbetterdiń ýaqtyly jóndelýi men syrlanýyna, olardyń tıisti kútip ustaý men paıdalanylýyn qamtamasyz etýge mindetti Sondaı-aq, qasbetterdegi eskertkish taqtalardy, kóshe kórsetkishterin (tuıyq kósheler men alańdardy qosqanda), nómirlik belgilerdi, mańdaıshalardy jáne aqparattyq taqtalardy taza ári jaramdy jaǵdaıda ustaýǵa tıis.
Taǵy bir mańyzdy nárse – qys kezinde ǵımarattar men qurylystardyń ıeleri qar men muzdy shatyrdan tazartý jumystary bastalǵanǵa deıin turǵyn jáne turǵyn emes ǵımarattardyń ıelerin 24 saǵat buryn habardar etýge mindetti.
Saýda uıymdarynan komýnaldyq qaldyqty atalǵan nysandardyń menshik ıesi nemese QR zańnamasyna sáıkes, qaldyq shyǵarý qyzmetimen aınalysatyn uıymmen jasalǵan shart negizinde shyǵarylady.
Jóndeý jumystary kezinde paıda bolǵan qaldyqtardy arnaıy belgilengen oryndarǵa sol jumysty júrgizgen tulǵalar ózderi shyǵarady. Jóndeý kezinde shyqqan qaldyqtardy ýaqytsha qaldyq saqtaý oryndaryna nemese konteıner alańdaryna tastaýǵa tyıym salynady.
Eger qaldyq óndirgen adam óziniń jer teliminde ne ǵımaratynda jaldaý nemese basqa kelisim negizinde óz betimen qaldyqtardy jınamasa, shyǵarmasa jáne kádege jaratpasa, bul mindetter atalǵan jyljymaıtyn múlik nysandarynyń ıelerine júkteledi.
Bazarlar men olarǵa irgeles aýmaqtardy tazalaý jáne jınaý jumysyn uıymdastyrý «Tamaq ónimderiniń kóterme jáne bólshek saýda nysandaryna qoıylatyn sanıtarlyq-epıdemıologıalyq talaptar» sanıtarlyq erejege sáıkes tazartylady jáne jınalady.
Aýmaqtan tys jerlerge qoqys pen turmystyq qaldyqtardy tógýge jáne óndiris qaldyqtaryn kóshege shyǵarýǵa tyıym salynady. Suıyq turmystyq qaldyqtar arnaıy kóligi bar uıymdarmen shart boıynsha shyǵarylýǵa tıis.
Tólqujattaý kezeńderi
Tólqujattaý úderisi úsh kezeńge bólingen. Birinshi kezeńde magıstraldy kóshelerdegi, qalalyq mańyzy bar aımaqtarda jáne jaıaý júrginshiler keńistiginde myńnan astam nysan qamtylady. Ekinshi kezeńde aýdandyq mańyzy bar kóshelerge mán beriledi, al sońǵy kezeńde jergilikti mańyzy bar kósheler men aýlaishilik aýmaqtar qamtylady. Baǵdarlamany tolyq aıaqtaý 2025 jyldyń sáýirine josparlanǵan.
Aýdan ákimdikteriniń kóriktendirý jáne ekologıa bólimderi kóriktendirý jónindegi talaptardyń oryndalýyn qadaǵalaıdy. Ereje buzǵan kásipkerler QR Ákimshilik quqyq buzýshylyq týraly Kodeksine sáıkes ákimshilik jaýapkershilikke tartylady.
Tólqujatta sýbektiniń ataýy, mekenjaıy, baılanys telefony, menshik ıesiniń málimetteri, QTQ shyǵarý týraly kelisim-shart, qatty jabynnyń aýdany, kógaldyń aýdany, aǵashtar men butalar sany, shaǵyn sáýlet pishinderiniń bolýy jáne bekitilgen aýmaqtyń syzbasy kórsetiledi.
Tólqujatqa aýdan ákimdigi men kásipker birlesip qol qoıady, bul rásimniń ashyqtyǵyn qamtamasyz etedi. Sondaı-aq, buryn kózdelmegen ýchaskelerdi kóriktendirýge qosymsha shyǵyndardyń týyndaý qaýipi joqqa shyǵarylady.
Esterińizge sala keteıik, jańa kóriktendirý erejeleri Almatynyń ál-aýqatyn saqtaýǵa baǵyttalǵan jáne «Taza Qazaqstan» respýblıkalyq baǵdarlamasynyń maqsatyna sáıkes keledi, bul qala turǵyndary úshin qaýipsiz ár ekologıalyq taza orta qurýǵa yqpal etedi.
Jańa erejege sáıkes, buqaralyq is-sharalardy uıymdastyrýshylar konsertter, festıváldar jáne jármeńkelerden keıin tazalyq jumystaryn júrgizýge mindetti. Bul qalada tazalyq pen tártipti saqtaýǵa septigin tıgizedi.