Almatyda «Ana, áke jáne men – sportty jaqsy kóretin otbasy» degen uran qaıta jańǵyrdy. Almaly aýdanyndaǵy bir aýlanyń turǵyndary úshin aýdan ákimdigi men iConic Creative School, sondaı-aq qalalyq Sport basqarmasy birlesip «Kóńildi jarystar» atty otbasylyq saıystar uıymdastyrdy.
Týrnır baǵdarlamasyna týrnıkke tartylý, basketbol saqınasyna dáldep laqtyrý, qol kúres, arqan tartý, otbasylyq estafeta jáne bı saıysy kirdi. Jeńimpazdar men júldegerlerge baǵaly syılyqtar, sondaı-aq iConic mektebiniń qyzmetine 10 jáne 20 myń teńgelik sertıfıkat tabystaldy.
Uıymdastyrýshylar ata-analardy balalar úshin shabyt berýshi ári úlgi bolýǵa shaqyrdy. Analar men ákeler jarysqa erekshe qulshynyspen qatysyp, al jas almatylyqtar úzdik ataný úshin baryn saldy.
Nemeresi Adıamen kelgen Tileýbaı Jumajanov is-sharaǵa rızashylyq bildirip:
«Balalardyń qulshynyspen jarysyp júrgenin tamashalaý – úlken qýanysh. Almaly aýdanynyń bastamasy jalǵasyn taýyp, bolashaqta keń qoldaý kórse eken», — dedi.
iConic mektebiniń basshysy Roman Mıronov barlyq turǵyn jarysqa erkin qatysa alatynyn aıtyp, basty maqsat – balalardy belsendi demalysqa baýlý ekenin atap ótti:
«Jyldyń sońǵy jyly kúnderin tıimdi paıdalanyp, balalarǵa sporttyq qyzyq oıyndardyń ınternettegiden áldeqaıda qyzyqty ekenin kórsetkimiz keledi. Kópshiligi kompúterlik týrnırdi jón kóredi, biraq qarsylasyńdy kózbe-kóz kórip, ádil jarysta jeńiske jetýdiń áseri múlde bólek. Balalar men ata-analardyń shynaıy qýanyshyn kórip, ózim de sergip qaldym.
Bul bastama qoldaý taýyp, jyl mezgiline qaramastan otbasylyq jarystar Almatynyń barlyq aýlasynda ótkizilip tursa eken. Mundaı dástúr súıikti qalamyzdyń ózindik erekshelikteriniń birine aınalýy múmkin».
Mundaı aýladaǵy bastamalar Almatynyń «Ana, áke jáne men – sporttyq otbasy» degen rýhty megapolıstiń jańa jaǵdaıynda da saqtap kele jatqanyn kórsetedi. Aýladaǵy kezdesýler kórshilerdi, ata-analar men balalardy biriktirip, bir jaǵadan bas, bir jeńnen qol shyǵaryp, densaýlyqty nyǵaıtýǵa, dostyqty arttyrýǵa jáne qalaǵa degen súıispenshilikti bekemdeýge múmkindik beredi.