Jastar saıasaty basqarmasynyń, sondaı-aq QR Mádenıet jáne aqparat mınıstrliginiń bastamasymen, vedimistik uıymdarmen jáne respýblıkalyq jastar qoǵamdyq birlestikterimen birlesip, aımaqtardy tazartý boıynsha «Kıeli tabıǵat» respýblıkalyq ekologıalyq senbiligi ótip jatyr.
Atalǵan shara qala kúnine oraılastyryldy.
Respýblıkalyq senbilikte bir mezgilde elimizdiń barlyq óńirinde oblystyq jastar uıymdarynyń ókilderi, stýdentter men ekologıalyq eriktiler aýmaqty qoqystan tazartyp qana qoımaı, aǵash kóshetterin otyrǵyzdy.
Ekologıa salasyndaǵy belsendiler men ekologtar kelip, qoqysty suryptap jınaýdy túsindirdi. Ekoaksıaǵa 14-35 jas aralyǵyndaǵy 300-ge jýyq erikti jınaldy.
«Búgin mınıstrliktiń bastamasymen Almaty qalasy Jastar saıasaty basqarmasynyń qoldaýymen aksıa ótýde. Keshe dál osy jerdi tazalaý jóninde turǵyndardan ótinish kelip tústi. Bul - Medeý aýdanyndaǵy eń kóp qoqys jınalǵan aımaq.
Basty maqsat - jastar men qala turǵyndaryna tabıǵatty aıalap ustaý ıdeologıasyn jetkizý. Mundaı naýqandar qalamyzda jıi ótip turady. Arnaıy osy baǵytta jumys isteıtin ekobelsendiler men eriktiler bar», - dedi Almaty qalasy jastar saıasatyn damytý memlekettik qor dırektorynyń mindetin atqarýshy Baǵdat Anarbaeva.«Qalany qoqystan tazalaý, onyń ishinde qoqysty suryptaý - óte ózekti ekologıalyq máselelerdiń biri. Tabıǵattyń tazalyǵyn saqtaý úshin aldymen qoqystan arylý shart. Turmystyq qaldyqtardy suryptap baryp, qoqys jáshigine tastaǵan jón. Jastardyń kóbi qarapaıym qaǵıdalardy bilmeı jatady. Sondyqtan osyndaı ekosharalar jıi bolyp turý kerek dep sanaımyn. Assambleıa jastary árdaıym qoldaýǵa , qatysýǵa ázir», - deıdi Qazaqstan uıǵyr jastary odaǵynyń tóraǵasy Rýstam Kaıryev.
«Aksıa ótetinin “Qamqor” qorynan estidim. Ekologıalyq sharalarǵa jıi qatysyp turamyn. Tazalyq saqtalǵan jerde ǵana tabıǵatqa zıan kelmeıdi», - deıdi 169 mekteptiń 10-synyp oqýshysy Jansaıa Qusaıynova.