Almatyda bilim berý ınfraqurylymyn damytý boıynsha qarqyndy jumys júrgizilip jatyr. Qala ákiminiń orynbasary Azamat Qaldybekov Óńirlik komýnıkasıalar qyzmetiniń alańynda osylaı dep habarlady.
«Qazir Almaty qalasynda 349 mektep bar, onda 354 myńnan astam oqýshy bilim alyp jatyr. Halyq sany jyl saıyn 12–14 myń adamǵa ósip jatqandyqtan 33 myńnan astam oqýshy orny jetispeıdi. Qabyldanyp jatqan is-sharalardyń nátıjesinde bıyl bul tapshylyq 16 500 orynǵa deıin azaıady», – dedi qala ákiminiń orynbasary.
Shaharda «Keleshek mektepteri» jobasy da úlken qarqynmen ise asa bastady. Búgingi tańda jalpy syıymdylyǵy 34,8 myń oqýshy ornyn qamtıtyn 21 mektep salynyp jatyr.
Joba aıasynda 12 600 oryndyq 8 jańa mektep salynyp, paıdalanýǵa berildi. Qazan aıynyń sońyna deıin taǵy 10 500 oryndyq 5 mekteptiń ashylmaq. Sonymen qatar, jeke ınvestısıalar esebinen «satyp alý» tetigi arqyly salynǵan 11 700 oryndyq 8 mektep bıyl paıdalanýǵa beriledi.
«Budan bólek, 2025 jyldyń sońyna deıin 550 oryndyq bir mektepti ashyp, jalpy syıymdylyǵy 2 100 oryndy 2 mektepti satyp alyp, 6 mektepke japsarjaılar salý josparlanǵan. Bul qosymsha 1 795 oryn beredi», – dep atap ótti qala ákiminiń orynbasary.
Qalada sonymen qatar 31 mekteptiń tizimi bekitilgen «2025–2027 jyldarǵa arnalǵan 1300 mektepti jańalaý» jobasy iske asyrylyp jatyr. Bıyl 15 mektepte jóndeý-qaıta jańartý jumystary josparlanǵan, olardyń altaýynda (№160, 73, 60, 50, 30 jáne 124) qurylys jumystary bastalyp ketti. Keler jyly taǵy 9 mektep, 2027 jyly 7 bilim berý nysany jańartylady.
Jańartý baǵdarlamasyn júzege asyrý mektepterdiń jalpy syıymdylyǵyn shamamen 5 myń orynǵa arttyryp, ǵımarattardyń seısmoturaqtylyǵyn kúsheıtip, muǵalimder men oqýshylarǵa jaıly jaǵdaı jasaýǵa múmkindik beredi.