Almatyda balalardyń kólik apatynan zardap shegý oqıǵasy kóbeıip ketken
Almatyda jyl basynan balalardyń qatysýymen 30 jol-kólik oqıǵasy boldy. Bul týraly Almaty qalalyq DP jergilikti polısıa qyzmeti basqarmasynyń bastyǵy Manap Aǵzamuly onlaın brıfıńte aıtty, dep habarlaıdy Almaty-akshamy.kz
«Byltyr Almatyda balalardyń qatysýymen 25 jol-kólik oqıǵasy boldy, odan 31 bala dene jaraqatyn aldy. Bıyl jyl basynan balalardyń qatysýymen jol-kólik oqıǵasy 30-ǵa artty. Odan 34 bala dene jaraqatyn aldy. Sondaı-aq, byltyr men bıylda jol-kólik oqıǵalarynan balalardyń qaıtys bolý deregi bolǵan joq», - dedi Manap Aǵzamuly.
Onyń aıtýynsha, aýa raıy jaqsy bolǵan kúnniń ózinde qalada orta eseppen apta saıyn balalardyń qatysýymen 5-7 jol-kólik oqıǵasy bolady. Eger aýa raıy buzylsa, mysaly, jańbyr, qar jaýǵan kúnderi jol-kólik oqıǵasy 15-ke deıin artatyn kúnder bolady. Al kúnine balalardyń qatysýymen shamamen 1-2 jol-kólik oqıǵasy bolyp turady.
Sondaı-aq Manap Aǵzamuly qala mektepterinde jol júrý erejesin úıretýge arnalǵan synyptar bar ekenin, onda balalarǵa jol júrý erejesi týraly kúndelikti sabaq ótetinin atap ótti.
Jalpy, balalardyń jol júrý erejesin bilýi, ony durys saqtaý, ata-analarǵa da baılanysty dep esepteıdi Manap Aǵzamuly.
«Tártip úıden bastalady. Ár ata-ana óz balasyn mektepke jibererde, úı men mekteptiń arasynda qalaı júrý kerek ekenin, jol erejesin buzbaý týraly aıtyp, eskertip otyrý kerek. Ókinishke oraı, qazir ata-analar buǵan kóp kóńil bólmeıdi. Sebebi, qazir balalardyń kóbinde uıaly telefon bar. Olar kóshede soǵan telmirip, kóńilderi bólinip júredi. Keıbiri qulaqqap taǵyp, aınaladaǵy kólikterdiń sıgnalyn da estimeıdi. Sondyqtan balanyń mektepke telefonsyz barýy nemese tek habarlasý úshin ǵana balaǵa uıaly telefon berý týraly másele qarastyrylǵany durys dep oılaımyn», - dedi spıker.
Ol ata-analardy balalarǵa durys tárbıe berip, jol erejesin buzbaýdy úıretýge shaqyrdy.