Elimizde jol jóndeý jumysy týraly neshe túrli pikir bar. Olardyń deni sapaǵa, jolǵa tóseletin qospalarǵa qatysty aıtylyp jatady. Sondyqtan jol aktıvteri sapasynyń ulttyq ortalyǵy Almaty fılıalynyń dırektory Máýlen Álipovten jol qurylysyna qatysty saýalymyzdy qoıyp kórdik.
Ótken jyly jol jóndeý jumystarynyń baqylaý aıasynda qansha kóshege tekseris júrgizildi?
2024 jyly Almaty qalasynda jol jóndeý jumystary qarqyndy júrgizildi. Osy jumystardyń sapasyn baqylaý maqsatynda Almaty qalasynyń Qalalyq mobıldilik basqarmasy jáne 8 aýdan ákimshilikterimen jasalǵan kelisimshart aıasynda bizdiń mekememiz 643 ınspeksıalyq tekseris júrgizdi. Bul tekserister barysynda 1 873 astam jol qurylys materıaldarynyń synamalary alynyp, zerthanalyq synaqtardan ótkizildi. Nátıjesinde, normatıvtik tehnıkalyq qujattarǵa sáıkes kelmeıtin 363 synama (19,3%) anyqtaldy.
Sapany tómendetken kompanıalarǵa qandaı sharalar qabyldandy?
Tekseris barysynda 208 buzýshylyq tirkeldi. Olardyń nátıjesinde, merdiger uıymdar óz qarajaty esebinen 183 mıllıon teńge somasyna jumystardy qaıta qurylymdaýǵa májbúr boldy. Bul tapsyrys berýshi tarapynan tómen sapaly jumystardy qabyldap, tólem jasap, jaýapkershilikti óz moınyna alý táýekelin aıtarlyqtaı tómendetti. Sonymen qatar, Almaty qalasynyń Qalalyq qurylys baqylaý basqarmasyna 15 ótinish berildi. 1 merdiger uıym men 1 ınjenerlik qyzmetke 2,5 mıllıon teńge mólsherinde aıyppul salynyp, 2 jaǵdaıda tehnıkalyq baqylaýshy sarapshylardyń jumysyn toqtatý sharalary qabyldandy.
Jol sapasyn arttyrý úshin qandaı jańa materıaldar oılap tabyldy?
Zertteý ınstıtýty retinde bizdiń maqsatymyz — jol qurylysynda qoldanylatyn materıaldardyń sapasyn arttyrý jáne olardyń uzaq merzimdiligin qamtamasyz etý. Osy maqsatta birqatar jańa materıaldar men tehnologıalar engizildi, olar tekseristen ótip, joǵary sapaly jáne qaýipsiz bolyp shyqty. Alaıda, bul proses úzdiksiz júrgizilýde, sondyqtan sapany arttyrý boıynsha jumystar jalǵasýda.
Bıylǵy jyly megapolıs kóshelerin jóndeýge baqylaý júrgizile me?
Almaty qalasynyń Qalalyq mobıldilik basqarmasynyń habarlaýynsha, 2025 jyly qalada 300 shaqyrym joldy ortasha jóndeý, 30 shaqyrym trotýar salý jáne 35 shaqyrym jańa jol salý josparlanyp otyr. Bul jumystar qaladaǵy sapaly joldardyń úlesin 2024 jylǵy 92%-dan 2025 jyly 95%-ǵa deıin arttyrýǵa múmkindik beredi. Osy jumystar aıasynda bizdiń mekeme tarapynan baqylaý men tekseris jumystary jalǵasatyn bolady.
Jolaıryqtardyń sapasy men uzaq merzimdiligi týraly ne aıtar edińiz?
2024 jyly Qulja tas joly alty jolaqqa keńeıtildi jáne Saıyn-Móńke bı jol aıryǵy boıynsha qozǵalys ashyldy. Bıyl, 2025 jyly Seıfýllın kóshesi men Jansúgirov kóshesiniń qıylysynda jańa kólik jol aıryǵyn qoldanysqa berý josparlanǵan. Bul jol aıryqtarynyń sapasy týraly mamandarmen 7 tekseris júrgizilip, 38 synama alyndy. Barlyq synamalar normatıvtik talaptarǵa saı boldy. Kópirlerdiń, ótkelderdiń, týnelderdiń jáne estakadalardyń kepildik merzimi keminde 5 jyldy quraıdy.
2024 jyly Almaty qalasynda jol jóndeý jumystarynyń sapasyn baqylaý aıasynda kóptegen tekserister men synaqtar júrgizilip, nátıjesinde jol qurylys materıaldarynyń sapasyn jaqsartý jáne merdigerlerdiń jaýapkershiligin arttyrý baǵytynda aıtarlyqtaı jumystar atqaryldy. Bıylǵy jyly qalada taǵy da aýqymdy jol jóndeý jumystaryn baqylaý jalǵasady, bul qaladaǵy joldardyń sapasyn odan ári jaqsartýǵa yqpal etedi.