Joba aıasynda 100-den astam jańa jumys orny ashylady.

QR ASHM baspasóz qyzmetiniń málimetinshe, Túriktiń Iskefe Holding kompanıasy Qazaqstanda İQM terisin óńdeýge jáne jelatın óndirý zaýytyn salýǵa 27 mln AQSH dollar ınvestısıalaıdy, dep habarlaıdy Almaty-akshamy.kz

QR Aýyl sharýashylyǵy mınıstri Erbol Qarashókeevtiń jaqynda prezıdenttik delegasıa quramynda Túrkıaǵa jasaǵan sapary barysynda Qazaqstan Respýblıkasynyń Aýyl sharýashylyǵy mınıstrligi men Iskefe Holding kompanıasy arasynda ózara túsinistik týraly memorandýmǵa qol qoıyldy.

Taraptar Almaty qalasynda kompanıanyń jelatın óndirý zaýytyn salýdy ınvestısıalaýy týraly kelisti. Josparlanǵan ınvestısıa kólemi – 27 mln AQSH dollary. Jobany iske asyrý merzimi 2022-2023 jyl dep josparlanyp otyr. Joba aıasynda 100-den astam jańa jumys orny ashylady. Kásiporyn ındýstrıalyq aımaǵynda iske qosylady, al shıkizat retinde iri qara mal terisi paıdalanylatyn bolady.

Zaýyt qurylysy bıyl bastalyp, 2023 jyly paıdalanýǵa beriledi dep boljanyp otyr, óndiris qýaty jylyna 7000 tonna jelatındi quraıdy. 

Elimizde terini bastapqy óńdeý boıynsha 9 kásiporyn jumys isteıdi. Biraq, óńdeýshi kásiporyndar aýyl sharýashylyǵy taýaryn óndirýshilerge İQM óńdelmegen terilerin satyp alý úshin básekege qabiletti baǵa usyna almaýda.  Usaq jáne jeke qosalqy sharýashylyqtar janýarlardyń terisin qoqysqa tastaıdy, al bul óz kezeginde asa qaýipti aýrýlarynyń taralý qaýpin týdyrady. 7000 tonna jelatındi óńdeý úshin shamamen 38 myń tonnaǵa jýyq shıkizat (teri) qajet.

Aıta ketý kerek, túrik holdıńiniń qurylymyna terini óńdeıtin, jelatın, proteın, gıdrolızat, janýarlardan alynatyn suıyq amınqyshqyldaryn óndiretin 7 zaýyt, sondaı-aq ǵylymı-zertteý ortalyǵy men synaq zerthanalary kiredi. Búgingi kúni Iskefe Holding bylǵary salasyndaǵy ıntegrasıalanǵan iri óndirýshi, onyń úlesine Eýropa men Azıadaǵy ótkizý naryqtarymen sıyr jelatınine álemdik qajettiliktiń 6% - y tıesili.