Almatyda jedel járdem kóligi men jeńil avtokólik soqtyǵysyp, saldarynan "103" kóliginiń jolaýshysy qaza tapty, - dep habarlaıdy aqshamnews.kz tilshisi.
Polısıa departamentiniń málimetinshe, jol-kólik oqıǵasy 3 jeltoqsanǵa qaraǵan túni, saǵat 00:40-ta Alataý aýdanynda bolǵan. Alǵashqy málimetterge sáıkes, jedel járdem kóliginiń júrgizýshisi Saıyn kóshesimen soltústik baǵytta kele jatyp, burylys jasaý kezinde qarsy baǵyttaǵy Kia avtokóligimen soqtyǵysqan.
Qatty soqqynyń saldarynan eki kóliktiń de júrgizýshileri men jolaýshylary jaraqat alǵan. Zardap shekkender aýrýhanaǵa jetkizilgen.
"2002 jyly týǵan jedel járdemniń jolaýshysy alǵan jaraqattarynan soń birneshe saǵattan keıin aýrýhanada qaıtys boldy. Polısıanyń tergeý basqarmasy adam ólimine ákep soqqan jol-kólik oqıǵasy boıynsha qylmystyq is qozǵady, qajetti saraptamalar taǵaıyndaldy", - dep habarlady polısıa.