Almatyda qala qonaqtary men turǵyndary úshin 20 jeltoqsannan 5 qańtarǵa deıin Respýblıka Saraıynyń aýmaǵynda jańajyldyq festıvál ótedi, dep habarlaıdy Almaty-akshamy.kz.
Festıvál aıasynda Abaı alańynda 26 sándik kishi sáýlet pishinder (KSP), túrli dúkenderi men meıramhanalary bar 30 úı, sondaı-aq fotoaımaqtar ornatyldy, qazaqstandyq estrada juldyzdarynyń qatysýymen konsertter josparlanǵan:
- 29 jeltoqsanda saǵat 18:40-ta sahnada Ninety one toby men Asia laıv-bend óner kórsetedi;
- 30 jeltoqsanda saǵat 18:40-ta Nazima jáne Ava Band laıv-bend qoıylymdary ótedi:
- 3 qańtarda saǵat 18:40-ta laıv-bend Guinness.
Negizgi mádenı sharalar 31 jeltoqsanda «Astana» alańynda – saǵat 21:00-den 23:50-ge deıin qazaqstandyq estrada juldyzdarynyń qatysýymen merekelik konsert ótedi. Keshtiń júrgizýshileri Danıar Batyrbaev, Dáýlet Bıjanov jáne Anara Batyrhan. Sahnada Abaı Begeı, Mádına Sádýaqasova, Móldir Áýelbekova, Rano Omarova, Parvız Nazarov, Luina, Asqat Tarǵyn, Dımash Dáýletov, Nursultan Nurberdıev, «Orda», Ninety One, «KeshYou», «Jigitter», «Shamıs» toptary, Búrkit pen Aısha, Álı Oqapov, Mádı Rymbaev óner kórsetedi. Prezıdenttiń quttyqtaý sózinen keıin qalada 10 mınýtqa deıin sozylatyn merekelik otshashý bolady.
Jańajyldyq qysqy festıvál jańajyldyq syılyqtar boıynsha tamasha ıdeıalary bar qazaqstandyq dızaınerler men qolónershilerdiń ózderi jasaǵan aǵash oıynshyqtar, zergerlik buıymdar, balaýyz shamdar, toqylǵan aksesýarlar, syılyqtardy bezendirý, eresekter men balalarǵa arnalǵan kıim-keshekter usynatyn jańajyldyq jármeńkege jalǵasady.
Eske salsaq, qalanyń bas shyrshasy Abaı alańynda ornalasqan, onyń bıiktigi 22 metr, 350 oıynshyq jáne 10 myń merekelik gırlándalarmen bezendirilgen.
Qalada barlyǵy segiz jasandy shyrsha qoıylǵan, olar myna jerlerde ornalasqan:
«Almaty Arena» muz saraıynyń aldyndaǵy alańda;
* Astana alańynda;
* Abaı alańynda;
* N. Sas atyndaǵy balalar men jasóspirimder teatry aldyndaǵy alańda;
* Balýan Sholaq atyndaǵy sport jáne mádenıet saraıynyń aldynda;
* Tuńǵysh Prezıdent saıabaǵynda;
* Ǵ. Músirepov atyndaǵy balalar men jasóspirimder teatrynyń aldynda;
* QBTÝ ǵımaratynyń aldyndaǵy alańda.
Medeý, Almaly aýdandarynda jáne Astana alańynda fýdkort úıleri men núkteleri ornalasqan. Panfılov jáne Jibek joly jaıaý júrginshiler kóshelerinde "juldyzdy aspannyń" 2 segmenti bezendirilip, 12 taqyryptyq KSP jáne 4 foto aımaq ornatyldy. Tuńǵysh Prezıdent saıabaǵynda jańajyldyq stılde bezendirilgen 8 aımaq uıymdastyrylǵan. Qala boıynsha bıiktigi 1-den 2,5 metrge deıingi ertegi keıipkerleriniń 40 kólemdi fıgýrasy ornatyldy.
Almatyda bes tegin muz aıdyny ashylǵan - Tuńǵysh Prezıdent saıabaǵynyń aldynda, Respýblıka Saraıynyń aldynda, Áýezov aýdanyndaǵy Yqylas,9 mekenjaıdaǵy Taýgúl yqshamaýdanynda, Naýryzbaı aýdany ákimdiginiń aldynda Shuǵyla shaǵynaýdany, 347-de, Túrksib aýdanyndaǵy Seıfýllın kóshesi, 13 mekenjaıdaǵy №6 Oqýshylar úıiniń aldynda. Jaqyn arada Jetisý aýdanyndaǵy "Gúlder" saıabaǵynda taǵy bir muz aıdyny ashylady.
Muz aıdyndaryna kirý – tegin, kónkıdi bir seansta jalǵa alý quny (2 saǵat) 1000 teńgeni quraıdy. Kónkımen kelgender úshin kónkı tebý tegin. Berý pýnktteri jumys kúnderi 10:00-den 22:00-ge deıin jáne demalys kúnderi 10:00-den 23:00-ge deıin jumys isteıdi, muz aıdyndarynyń ózi táýlik boıy jumys isteıdi.Jańa jyldyq is-sharalardyń tolyq kestesi Almaty qalasy mádenıet basqarmasynyń (@almatymadeniet) Instagram-daǵy resmı akkaýntynda jarıalanǵan.