İzdeý jarıalanǵan qos qylmysker qolǵa tústi.
Kúdiktilerdiń biri adamǵa aýyr dene jaraqatyn salǵany úshin memleketaralyq izdeýde bolǵan, dep habarlaıdy Almaty-akshamy.kz Polisia.kz-ke silteme jasap.
Ekinshisi adam tonaǵan.
«Bizdiń bólimsheniń krımınaldyq polısıa qyzmetkerleri “Quqyqtyq tártip” respýblıkalyq jedel aldyn alý is-sharasy barysynda eki qylmyskerdi de ustady. Qylmys ornynan qashyp ketken 26 jastaǵy K. esimdi azamatqa biz izdeý jarıalaǵan bolatynbyz. Ustaý barysynda onyń qasynda 22 jastaǵy S. esimdi azamat boldy. Bul kúdiktini Jambyl oblysy Qordaı aýdany polısıasyndaǵy áriptesterimizdiń izdep jatqandyǵy anyqtaldy. Ol sol jaqta adamdy tonap ketken», – dedi Naýryzbaı aýdandyq polısıa basqarmasynyń bastyǵy Danıar Meńdebaev.
Onyń aıtýynsha, kúdiktilerdi ustaý kezinde olardan kesilgen sholaq myltyq pen oǵan arnalǵan patrondar tabylyp, tárkilendi. Sonymen qatar sot-ballıstıkalyq saraptama taǵaıyndaldy.