46-dan 100-ge deıin ulǵaıtý kózdelip otyr.
Megapolıste búgingi kúni múgedektigi bar jandarǵa 46 ınvataksı qyzmet kórsetedi. Aldaǵy ýaqytta olardyń sanyn 100-ge jetkizý josparda, dep habarlaıdy Almaty-akshamy.kz QazAqparatqa silteme jasap.
«Almatyda qala basshysynyń bastamasymen ınvataksı sany artady. Invataksı avtokólikterin 46-dan 100-ge deıin ulǵaıtý úshin jergilikti búdjetten qosymsha 244 mln teńge bólindi», - dedi qalalyq jumyspen qamtý jáne áleýmettik baǵdarlamalar basqarmasy basshysynyń orynbasary Danıar Álkebaıuly brıfıń barysynda.
Aıtýynsha, ınvataksı qyzmetin aıyna 1 500 eresek jáne 357 múmkindigi shekteýli bala paıdalanady. Sondaı-aq, 15 700 múgedektigi bar janǵa kómek berilgen.
«Jyl basynan beri Almatyda turatyn 10 500 múmkindigi shekteýli jan tehnıkalyq ońaltý quraldaryn aldy. Sonymen birge, 5 200 múgedektigi bar adamdarǵa ymdaý tili mamandarynyń, jeke kómekshilerdiń kómegi túrinde áleýmettik qyzmetter kórsetiledi, sondaı-aq shıpajaılyq emdelýge jiberildi. Ákimdikte ınklúzıvti qoǵamdy damytý úshin barlyq sharalar qabyldanyp jatyr», - dedi ol.
Qazirgi ýaqytta qalada 53 myńnan astam múmkindigi shekteýli jan turady. Onyń ishinde 18 jasqa deıingi múmkindigi shekteýli balalar sany – 8 151.
«Jeke ońaltý baǵdarlamasynyń arqasynda múgedekter ońaltýǵa arnalǵan tehnıkalyq quraldarmen jáne áleýmettik qyzmettermen tegin qamtamasyz etiledi. Qajetti qarajatty «áleýmettik qyzmetter portalynan» ótinim arqyly alýǵa bolady, jekelegen jaǵdaılarda biz memlekettik satyp alý arqyly jeke irikteýdi talap etetin tehnıkalyq quraldardy satyp alamyz», - dep túsindirdi Danıar Álkebaıuly.
Spıker qalada 2021-2023 jyldarǵa arnalǵan nysandarǵa qoljetimdiliktiń keshendi jospary júzege asyrylyp jatqanyn atap ótti.