Almatyda áıelder men balalardyń ál-aýqatyn baǵalaý úshin mýltıındıkatorlyq klasterlik zertteý (MICS) bastaldy.
Almatyda saýalnamaǵa 1536 úı sharýashylyǵy qatysady. Bul týraly Óńirlik komýnıkasıalar qyzmetiniń alańynda Qazaqstan Respýblıkasy Strategıalyq josparlaý jáne reformalar agenttiginiń Almaty qalasy boıynsha Ulttyq statısıka búrosy departamentiniń basshysy Darhan Isaev málimdedi, dep habarlaıdy aqshamnews.kz
Spıkerdiń aıtýynsha, QR Ulttyq statısıka búrosy IýNISEF-pen birlesip, 2024 jylǵy 2 qyrkúıekten bastap Qazaqstanda halyqaralyq mýltıındıkatorlyq klasterlik zertteý (MICS) júrgizýdi bastady, ol eldiń 20 óńirin qamtıdy.
MICS-tiń negizgi maqsaty – áıelder men balalardyń densaýlyǵy men ál-aýqatyn baǵalaý jáne memlekettik saıasattyń tıimdiligin arttyrý úshin mańyzdy derekterdi jınaý. Saýalnama densaýlyq saqtaý, tamaqtaný, bilim berý, balalardyń damýy máselelerin qamtıdy, sonymen qatar psıhıkalyq densaýlyq, jumyspen qamtý, neke jáne ómirdiń basqa da mańyzdy aspektileri qarastyrylady.
«Dalalyq jumystar bastalmas buryn saýalnama alatyndarǵa arnalǵan oqytý semınary ótkizildi, onda mamandar saýalnama júrgizýge daıyndaldy. Ulttyq jáne halyqaralyq saýalnamalarda tájirıbesi bar suhbat berýshiler úı sharýashylyqtary, áıelder, erler jáne ártúrli jastaǵy balalar úshin bes negizgi saýalnamany paıdalanady. Barlyq saýalnamalar memlekettik organdarmen kelisildi», – dedi D.Isaev.
Ár saýalnama turmys pen densaýlyqtyń túrli aspektilerin qamtıdy:
- úı sharýashylyǵynyń saýalnamasy;
- áıelderge arnalǵan saýalnama;
- erlerge arnalǵan saýalnama;
- bes jasqa deıingi balalar týraly saýalnama;
- bes jastan on jeti jasqa deıingi balalar týraly saýalnama.
Saýalnamaǵa erikti jáne jasyryn túrde qatysýǵa bolady. Ulttyq statısıka búrosy saýalnamaǵa qatysqan úı sharýashylyqtaryn erekshe formasy men belgileri bar suhbat júrgizýshilerdiń jumysyna túsinistikpen qaraýǵa shaqyrady.
Barlyq derekter tek statısıkalyq maqsattar úshin paıdalanylady, al qorytyndy esep Búro men IýNISEF saıtynda jarıalanady. Barlyq týyndaǵan suraqtar boıynsha 1446 nómiri arqyly Búronyń baılanys ortalyǵyna habarlasýǵa bolady.