Almaty polısıasy QR QMA-men birlesip, qalalyq prokýratýranyń úılestirýimen esirtki jelisin joıdy.
Bes adam marıhýanany jetkizýmen jáne satýmen aınalysyp kelgen, dep habarlaıdy Almaty-akshamy.kz.
Esirtki qylmysymen aınalysqandar: birge turatyn jup, olardyń dosy – betbelgi qoıýshy jáne kýrer. Jas juptyń qylmystyq prosestiń jetekshileri ekendigi jedel jáne tergeý is-sharalary barysynda belgili boldy. 27 jastaǵy L.esimdi azamat pen onyń 35 jastaǵy serigi – K.esimdi azamatsha uıymdastyrýshy jáne úılestirýshi qyzmetin atqardy. Betbelgi qoıýshylardyń mindetterin 30 jastakǵy B.esimdi azamat jáne 28 jastaǵy A.esimdi azamat oryndady. Al shabarman 25 jastaǵy A.esimdi azamat boldy.
«Qala prokýratýrasynyń úılestirýimen “Esirtki qylmysyna qarsy kúres” jobasy aıasynda júrgizilgen maqsatty jedel-izdestirý is-sharalarynyń nátıjesinde bizdiń bólimsheniń qyzmetkerleri QR İİM EQD, QR AFM ókilderimen birlesip, messendjerler arqyly baılanyssyz ádispen esirtki satýdy jolǵa qoıǵan esirtki satýshylardyń qylmystyq áreketteriniń jolyn kesti. Qaskóılerdiń Ispanıa men AQSH-tan poshta arqyly esirtki salynǵan sálemdemelerdi alǵany belgili boldy. Shóp úshin tólemdi tutynýshylardan Qiwi ámıan arqyly alǵan. Qarajatty shyǵarýdy ekinshi deńgeıli bankter arqyly júrgizgen. Tergeýdiń osy kezeńinde 49 banktik esepshot anyqtaldy», – dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
E.Álmaǵambetov kúdiktilerdiń qylmystyq áreketteri resmı túrde qujattalǵanyn, “satyp alýlar” júrgizilgenin atap ótti. Sonymen qatar kúdiktilerdiń turǵylyqty jerinde ruqsat etilgen tintý jumystary júrgizildi. Negizgi aıyptalýshylardyń páterinen 6 mıllıon teńge, SIM-kartalar, bank kartalary, elektrondy tarazylar, sondaı-aq erekshe ıisi bar shıshka ósimdik zattary tabyldy jáne tárkilendi. Ustalǵandar qamaýǵa alyndy. Polısıada QR QPK-niń 201-babyna sáıkes ózge aqparattar tergeý múddesine oraı jarıalaýǵa jatpaıtynyn aıtyp ótti. QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady.