Zańǵa ózgerister men tolyqtyrýlar bıyl kúzde qabyldanady.
Megepolıs basshysy Erbolat Dosaev qalada elektrsamokattardy paıdalaný máselesine qatysty pikir bildirdi, dep habarlaıdy Almaty-akshamy.kz
Bostandyq aýdanynyń turǵyndary ákimmen kezdesý kezinde jaıaý júrginshiler jolynda samokatpen qatty júretinderge shaǵymdandy.
«Qalada samokattarǵa qatysty sheshim qabyldandy, azdy-kópti tártipke keltirýge kiristik. Biraq zańnyń qabyldanýyn kútip otyrmyz, zańǵa ózgerister men tolyqtyrýlar bıyl kúzde qabyldanady. Qala deńgeıinde merdigerlermen memorandýmǵa qol qoıdyq, olar qazirdiń ózinde saıabaq aýmaqtarynan shyqty. Qazir osy úsh iri operatorǵa arnaıy avtoturaqtardy qarastyryp jatyrmyz. Bul - samokat minetinderge shekteýler. Tártip buzýshylar – osy erejelerdi saqtamaıtyn qalanyń jas turǵyndary. Memorandým aıasynda tamyzdyń aıaǵyna deıin tártip áldeqaıda jaqsarady dep senemiz. Biraq zań kerek. Zań shyqqansha bul máseleni qalamyzdyń ishki sheshimderimen qarastyramyz», - dedi Dosaev.
Qalalyq mobıldilik basqarmasy basshysy Ǵanı Myrzahanovtyń aıtýynsha, Almatyda ortaq seriktestikterdiń elektrosamokattaryna qazirdiń ózinde shekteý qoıylǵan.
«Jyldamdyq boıynsha - saǵatyna 25 shaqyrym. Bul samokat tebýdi endi úırenip júrgenderge. Al samokat tebýdi úırenbegenderge saǵatyna shamamen 20 shaqyrym bolady», - dedi Myrzahanov.