«El erteńi» qoǵamdyq qorynyń ókilderi ózderiniń baspasóz konferensıasynda jastardy saılaý úrdisine belsene qatysýǵa shaqyrdy.
Brıfıń spıkerleri – saıasattanýshy, tarıhshy Talǵat Janysbaı, bloger jáne saıası belsendi Azamat Joldanbaev pen jýrnalıs ári aýdarmashy Anastasıa Ýlchenko shtab qyzmeti men táýelsiz baqylaýshylar pýlyn qurý bastalǵanyn málimdep, oı-tujyrymdarymen bólisti.
– Tarıhqa kóz júgirtsek, ata-babalarymyz da bas qosyp, jınalys-jıyndarda óz kóshbasshylaryn saılap otyrǵan. Saılaý – memleket pen halyq arasyndaǵy kópir ispetti.Aldaǵy saılaýda ashyqtyq pen ádildikti qamtamasyz etý úshin biz osy jumysty uıymdastyryp, saılaý úrdisin baqylaýǵa qatysýǵa sheshim qabyldadyq. Bizdiń basty maqsatymyz – jastarymyzdy bul jumysqa kóptep tartý, olardyń belsendiligin arttyrý jáne saıası saýattylyǵyn kóterý. Jaqyn arada biz baıqaýshylardyń sapaly tobyn quryp, olardyń bilikti dáris alýyn uıymdastyrýdy josparlap otyrmyz, – dedi Azamat Joldanbaev.
Sondaı-aq ol kezdesý barysynda táýelsiz baqylaýshylardyń shtaby qurylǵanyn aıta kelip, almatylyqtardy osy bastamany qoldaýǵa shaqyrdy.
«Búgingi baspasóz konferensıamyzdyń negizgi sebebi – jaqynda bolatyn Prezıdent saılaýy. Sondyqtan biz memleketimizdiń bolashaǵyna beı-jaı qaramaıtyn belsendi jastardan turatyn «El erteńi» táýelsiz baqylaýshylar shtabyn quryp jatyrmyz», – dedi áriptesiniń sózin qoldaǵan Talǵat Janysbaı.
Spıkerler ár baqylaýshynyń resmı tirkeletinin, olarǵa tıisti qujattardyń bári beriletinin, baqylaýshylar arnaıy oqytylatynyn aıtty.
Kezdesý barysynda Anastasıa Ýlchenko el arasynda BAQ ókilderin «tórtinshi bılik» dep ataıtynyn, jýrnalıs – halyqtyń kózi ári úni ekenin eske saldy. Ózi sondyqtan da elimizdiń azamaty ári jas maman retinde baqylaýshy bolýǵa sheshim qabyldaǵanyn aıtty.
«El erteńi» birlestigi qyzmetiniń basty maqsattarynyń biri – jastardyń boıynda saıası mádenıetti qalyptastyrý jáne jalpyhalyqtyq saılaýlarǵa qatysý tájirıbesin jetildirý.
«Biz jastardy elimiz úshin asa mańyzdy osy oqıǵadan tys qalmaýǵa shaqyramyz. Baqylaýshy bolǵysy keletin, birlestiktiń jumysyna atsalysam degen azamattardy biz oqytamyz, aqparattandyramyz, praktıkalyq kómek kórsetemiz. Bizdiń qozǵalysqa buryn baqylaýshy retinde tájirıbesi bar adamdar men qoǵamdyq uıymdar da qosylady dep úmittenemiz», – dedi jýrnalıs.