Almaty qalasy men Jetisý oblysyna qarasty Qylmystyq-atqarý júıesi departamentiniń №12 mekemesine ekstremızm men terorızm úshin sottalǵandarmen jumys isteýge arnalǵan zamanaýı tehnıkalyq jabdyqtar tabystaldy, dep habarlaıdy Aqshamnews.kz.
Jabdyqtar BUU-nyń Esirtki jáne qylmys jónindegi basqarmasy (ÝNP OON) men AQSH elshiliginiń ókilderi qatysqan sapar aıasynda berildi. Delegasıa quramynda AQSH úkimetiniń terorızmge qarsy kúres jónindegi búrosynyń aımaqtyq keńesshisi Teodor Kreıg, AQSH elshiliginiń ókilderi Djeremı Anderson men Sesılıa Cho, sondaı-aq BUU-nyń Qazaqstandaǵy baǵdarlamalyq keńsesiniń basshysy Madına Sarıeva boldy.
Qazaqstan tarapynan QAJK tóraǵasynyń orynbasary Janıbek Baımaǵanbetov, Operatıvtik basqarma bastyǵynyń orynbasary Daýlet Ábraev, Rejım, qadaǵalaý jáne kúzet basqarmasy bastyǵynyń orynbasary Erjan Jumadilov, ÝVSPRSO-nyń bas maman-psıhology Lúdmıla Ignatenko jáne QAJ departamentiniń bastyǵy Rysbek Turǵymbaev qatysty.
QAJ komıtetiniń málimetinshe, bul shara qaýipsizdik deńgeıin arttyrýǵa, aldyn alý jumystarynyń jańa tásilderin engizýge jáne ekstremıstik ári terorıstik baǵyttaǵy qylmys jasaǵandarmen jumys isteıtin mamandardy qoldaýǵa baǵyttalǵan.
– Halyqaralyq seriktestermen osyndaı yntymaqtastyq qylmystyq-atqarý júıesiniń áleýetin arttyryp, ekstremızmniń aldyn alýǵa septigin tıgizedi, – dedi QAJ komıteti tóraǵasynyń orynbasary J. Baımaǵanbetov.
Bul jabdyqtardyń tabystalýy – Qazaqstannyń qaýipsizdik pen radıkaldanýdyń aldyn alý salasyndaǵy halyqaralyq uıymdarmen áriptestiginiń damýyna jasalǵan taǵy bir naqty qadam boldy.