Jumys sapary aıasynda Almaty ákiminiń orynbasary Beıbit Shahanov halyqaralyq áýejaı mańyndaǵy birqatar turǵyn úı kesheniniń qurylys barysyn tekserdi.
Tekserý barysynda «Bastion» turǵyn úı kesheniniń qurylysy azamattyq avıasıa salasyndaǵy ýákiletti organdardyń kelisiminsiz jáne ruqsatsyz júrgizilip jatqany anyqtaldy.
«Qoldanystaǵy zańnama talaptaryna sáıkes, áýeaılaqqa jaqyn aımaqtarda jáne belgilengen kúzet aýmaǵy radıýsynda ǵımarattardyń qabatyna shekteýler qoıylady. Osy aımaqta salynyp jatqan barlyq nysan tıisti kelisim alýǵa mindetti. Mundaı qujatsyz biz qurylysty toqtatamyz, qajet bolǵan jaǵdaıda súriledi», — dedi Beıbit Shahanov.
Sondaı-aq, «Dream City Tech» turǵyn úı kesheniniń qurylys alańynda qurylys salýshynyń qasbetti kelisimsiz qaptaı bastaǵany belgili boldy.
Qala ákiminiń orynbasary «Shyǵys qaqpasy» polıortalyǵyndaǵy barlyq qurylys nysanynyń sáýlettik kelbeti bekitilgen biryńǵaı tujyrymdamaǵa qatań saı bolýǵa tıis ekenin aıtty.
Bul zańbuzýshylyqtarǵa baılanysty atalǵan nysandarda barlyq qurylys jumysyn mindetti kelisim men ruqsat alynǵanǵa deıin toqtatý týraly sheshim qabyldandy.