Kardıologıa jáne ishki aýrýlar ǵylymı-zertteý ınstıtýtynda CRT-P Amvia Sky qurylǵysyn ornatýmen júrekti fızıologıalyq stımýlásıalaý boıynsha master-klass ótti. Ol standartty kardıostımýlátorlardan eń aldymen júrek yrǵaǵy ózgergishtigi barynsha fızıologıalyq yrǵaqqa jaqyn bolýymen erekshelenedi.
Stımýlásıa algorıtmi fızıkalyq ári psıhoemosıonaldyq júktemege jaýap berip, ómir sapasyn jaqsartýǵa jáne qolaısyzdyqtyń bolmaýyna yqpal etedi. Operasıa jergilikti anestezıamen jasaldy.
Eki naýqasqa jasalǵan operasıany arıtmologıa qyzmetiniń aǵa ordınatory Asylhan Parımbekov profesor Krzysztof Boczar, MD, PhD (Krakov, Polsha) qatysýymen júrgizdi. Bul – qarynshalardyń jıyrylý sınhrondylyǵy buzylǵan, júrek qyzmeti jetkiliksizdigi, sol jaq qarynshanyń jıyrylý fraksıasy tómendegen, AV-blokadadan keıingi, júreksheler ablásıasyn jáne kardıohırýrgıalyq aralasýlardy ótkergen naýqastar. Olarǵa arnaıy úsh kameraly kardıostımýlátorlar (CRT-P) qajet.
Master-klasqa qatysýshylar kardıoresınhrondaý terapıasy prınsıpterimen tanysty. Onyń klınıkalyq tájirıbede qoldanylýy, júrektiń ótkizgishtik júıesi aımaǵyna ımplantasıa jasaý kórsetildi.
«Master-klastar bizdiń mamandardyń medısınanyń sońǵy jetistikterinen habardar bolýyna, jańa emdeý ádisteri men tehnologıalardy meńgerýine, kórsetiletin medısınalyq kómektiń sapasyn arttyrýǵa jáne olardyń kásibı ósýine múmkindik beredi. Tájirıbe almasý dárigerlerdiń kásibı qyzmetke qajetti bilimderin, biliktilik pen daǵdylaryn jetildirýge yqpal etedi», – deıdi ınstıtýttyń Basqarma tóraǵasy Rústem Tóleýtaev.
Asylhan Búrkitbaıulynyń aıtýynsha, úsh kameraly CRT-P kardıostımýlátor qarynshalardyń sınhrondy jumysyn qamtamasyz etip, júrektiń nasos fýnksıasyn jaqsartady, qanaınalym tıimdiligin jáne naýqastardyń ómir sapasyn arttyrady. Olar júrektiń úzdiksiz jumysyn qamtamasyz etedi. Kardıoresınhrondaý terapıasy júrek qyzmetiniń jetkiliksizdigin emdeýdiń mańyzdy komponenti bolyp qala beredi, al úsh kameraly qurylǵylardy qoldaný uzaq merzimdi klınıkalyq nátıjelerdi jaqsartady.
«Júrektiń ótkizgishtik júıesine baǵyttalǵan CRT-P ımplantasıasy júrek qyzmeti jetkiliksizdigi bar naýqastarda uzaq merzimdi nátıjelerdi jaqsartýǵa jańa múmkindik ashady», – deıdi júrek yrǵaǵy jáne ótkizgishtigi buzylystary bólimshesiniń meńgerýshisi Baǵdat Ahyt.
Operasıalar sátti ótti. Kardıostımýlátormen naýqastar tolyqqandy ómir súre alady: jumys isteý, belsendi ómir saltyn ustaný, sportpen aınalysý, saıahattaý, ushaqpen ushý jáne t.b.