Almatyda Qazaqstannyń kórnekti memleket jáne qoǵam qaıratkeri Dinmuhamed Qonaevty eske alý kúni ótti.
Eske alý kúni aıasynda Keńsaı zıratynda quran oqylyp, onyń qala ortalyǵynda ornalasqan bústine gúl shoqtary qoıyldy. Sharaǵa D. Qonaevtyń týystary men jaqyndary, Almaty qalasy ákiminiń orynbasary A. Qyryqbaev, qoǵam ókilderi, qala turǵyndary qatysty, dep habarlaıdy Almaty-akshamy.kz.
Dál osy kúni D. Qonaev mýzeıinde jańarǵan ekspozısıa boıynsha ekskýrsıa ótti. Mamandar kórnekti memleket qaıratkeriniń 110 jyldyq mereıtoıy aıasynda mýzeıdi qalpyna keltirý jumystaryn júrgizgen bolatyn.
Eske salsaq, onyń ashylýy restavrasıadan soń aǵymdaǵy jyldyń 19 sáýirinde bolǵan edi. Atalǵan jumysqa elimizdegi mýzeı jáne arhıv salasynyń jetekshi mamandary, dızaınerler, músinshiler, sýretshiler, vıdeoınjenerler, t.b. tartyldy. Jumys barysynda jobanyń tujyrymdamasy men eskızi D.A. Qonaevtyń Halyqaralyq qorymen kelisip, ázirlendi.
