Almatyda sońǵy bir aıda balalarǵa shuǵyl medısınalyq kómek kórsetý ortalyǵyna kúnge kúıgen bes adam júgingen.
Úsh bala aýrýhanada em aldy. Ekeýi qabyldaý bóliminiń jaǵdaıynda kómek alyp, keıin ambýlatorlyq emdelýge jiberildi, dep habarlaıdy Almaty-akshamy.kz QazAqparatqa silteme jasap.
«Aýrýhanaǵa jatqyzylǵan balalardyń ekeýi Qapshaǵaı sý qoımasynda demalyp jatqanda, taǵy bir bala taýda serýendep júrgende kúnge kúıgen. Olarǵa bet, qol, ıyqtyń 1 jáne 2 dárejeli kúıik dıagnozy qoıyldy. Dıagnostıkalyq baqylaý kezinde naýqastarǵa aýyrsynýdy basatyn dári, antıbıotıkalyq terapıa, vıtamınder taǵaıyndaldy. Kúıik jara zalalsyzdandyryldy. Tórtinshi kúni naýqastardyń bári saýyǵyp, úıine shyǵaryldy», - dedi Almatydaǵy balalarǵa shuǵyl medısınalyq kómek kórsetý ortalyǵynyń kúıik aýrýlary bóliminiń meńgerýshisi Radja Jumadildaev.
Kún sáýlesine kúıip qalǵan taǵy bir pasıent №4 qalalyq klınıkalyq aýrýhanaǵa jatqyzyldy.
«Jaǵajaıda kúnge kúıgen naýqas bes kún boıy óz betinshe úıde emdelgen. Jaǵdaıynyń nasharlaýy saldarynan ol bizdiń aýrýhananyń jedel járdem bólimine túsip, aýrýhanaǵa jatqyzyldy. Oǵan ekinshi dárejeli (L55.1) kún kúıigi, denesiniń joǵary jáne tómengi I-II dárejeli últrakúlgin sáýlemen kúıgen kúıik dıagnozy qoıyldy. Naýqas besinshi kúni aýrýhanadan shyqty», - deıdi №4 qalalyq klınıkalyq aýrýhananyń kúıik bóliminiń meńgerýshisi Eldos Álmenov.
Dárigerler balalardy syrtqa shyǵarýǵa, tikeleı kún sáýlesinen aýlaq ustaýǵa keńes beredi.
«Balalarǵa tabıǵı materıaldardan tigilgen jeńil, keń kıim kıý kerek, 11-16 saǵat aralyǵynda tikeleı kún sáýlesinen aýlaq bolý kerek jáne kúnnen qorǵaıtyn kremderdi qoldaný qajet. Balalardy salqyn sýmen jáne jemistermen qamtamasyz etý de mańyzdy», - dedi balalar shuǵyl medısınalyq kómek ortalyǵynyń kópsalaly somatıkalyq bólimshesiniń meńgerýshisi Sholpan Qaıpnazarova.