Vaksınany aldymen oqýshylar, stýdentter, júkti jáne emizetin balasy bar analar alady
Almatyda 12 qarashada COVID-19 vırýsyna qarsy Pfizer vaksınasyn salý bastaldy. Qala boıynsha 300-den astam jasóspirim, júkti áıelder men bala emizip júrgen analar Comirnaty Pfizer / BioNTech vaksınasyn aldy, dep habarlaıdy Almaty-akshamy.kz.
Almaty qalasy Qoǵamdyq densaýlyq saqtaý basqarmasynyń málimetinshe, eń aldymen mektep oqýshylary, kolej stýdentteri, júkti jáne bala emizetin analar ekpe alǵan. Almaty qalasynyń turǵyny Veronıka Býksha Almatydaǵy №4 qalalyq emhanaǵa qaralǵan, osydan 2 aı buryn ekinshi sábıin dúnıege ákelgen. Veronıka búgin vaksınany birinshi bolyp aldy.
«Men bala emizetin anamyn, sondyqtan balamdy, ózimdi, otbasymdy múmkindiginshe qorǵaǵym keledi, emhanadan medısına qyzmetkerleri shaqyryp, alǵashqylardyń biri bolyp Pfizer vaksınasıasyn aldym, men óte qýanyshtymyn. Sebebi men osy kúndi kútken edim», - deıdi Veronıka.
Almaty qalasynyń turǵyny Qarlyǵash Altaeva bul vaksınany kópten beri kútip júrgenin aıtady.
«Men bul vaksınany kópten beri kútip júrmin, ol júkti áıelderge jasalady. Vaksına kelgeni belgili bolǵannan keıin olar meni shaqyrdy, birinshi komponentti aldym. Ótken jyly men COVID-19 aýrýymen aýyrdym jáne onyń qanshalyqty qıyn ekenin bilemin. Meniń aınalamnyń bári vaksınasıa alǵandar», - deıdi ol.
№4 Qalalyq emhana bas dárigeriniń orynbasary Sáýle Madárova sońǵy eki aptada emhanada Pfizer vaksınasy týraly túsindirý jumystary júrgizilgenin aıtady.
«№4 emhana 12 men 17 jas aralyǵyndaǵy 4540 bala oqıtyn 10 mektepke qyzmet kórsetedi. Erteń bizdiń dárigerler, ıaǵnı epıdemıologtar, salaýatty ómir saltyn ustanatyn dárigerler, jalpy tájirıbelik dárigerler mektep oqýshylarynyń ata-analaryna onlaın semınarlar ótkizedi. Búginde bala emizetin áıelder, júkti áıelder, kolej stýdentteri, joǵary oqý oryndary, sonymen qatar stýdentter ekpe aldy. Búgingi tańda vaksınaǵa 40 bala emizetin anadan, 29 júkti áıelderden, 38 mektep oqýshylarynyń ata-analarynan kelisim alyndy», - deıdi Madárova.