Almatyda kórnekti ádebıettanýshy ǵalym, profesor Beısembaı Kenjebaıulynyń qurmetine memorıaldyq taqtanyń saltanatty ashylý rásimi ótti.
İs-sharaǵa Almaty qalasy ákiminiń orynbasary Arman Qyryqbaev, qalalyq Mádenıet basqarmasynyń basshysy Ǵanı Maılıbaev, qazaq ádebıetiniń maıtalmany Dýlat Isabekov, M.Áýezov atyndaǵy Mádenıet jáne óner ınstıtýtynyń dırektory, akademık Kenjehan Matyjanov jáne ádebıettanýshy ǵalymnyń shákirtteri, týǵan-týystary, jas ádebıet súıer qaýym qatysty.
Sharany Beısembaı Kenjebaıulynyń shákirti, ádebıettanýshy, fılologıa ǵylymynyń doktory, profesor Qulbek Ergóbek júrgizip otyrdy. Memorıaldy taqtany ashýǵa muryndyq bolǵan Almaty qalasy ákiminiń orynbasary Arman Qyryqbaev aıtýly kúnde jınalǵan qaýymǵa rızashylyǵyn bildirdi.
Beısembaı Kenjebaıuly ǵalym, fılologıa ǵylymynyń doktory, profesor. «Jas qaırat», «Lenınshil jas», «Keńes týy», «Ońtústik Qazaqstan», «Sosıalıstik Qazaqstan» gazet-jýrnaldarynda eńbek etken.
Jazýshy, Qazaqstan Respýblıkasynyń Memlekettik syılyǵynyń ıegeri Dýlat Isabekov sóılegen sózinde ádebıettanýshy ǵalym týraly estelikterimen bólisti. Ásirese, Ál-Farabı atyndaǵy QazUÝ (ol zamanda Kırov atyndaǵy memlekettik ýnıversıtet) bilim alyp júrgen kezdegi ustazdyq etken kúnderdi eske aldy.
«Beısekeń bizdiń KazGÝ-de oqyp júrgende sabaq berdi. Men sol úshin ózimdi baqytty sezinemin. Qaıratty, shashy kirpiksheshenniń tikenegindeı, dıirmenniń tasyn qoısań jatpaıtyn shash bolatyn... Batyl-batyl pikirlerin aıtyp kelip, sender osyǵan qalaı qaraısyńdar, – degende, bárimiz qoldaýshy edik. Turyp-turyp, áı osy sender ótirik qoldaısyńdar ǵoı deım. Nege meniń aıtqanymnyń bárin qoldaı beresińder, – dep tańqalatyn. Shyndyqty aıtpaısyńdar ǵoı sender...», – dep estelikterimen bólisti.
Al Kenjehan Slámjanuly Matyjanov bolsa, «Biz Beısekeńniń dárisin tyńdamadyq. Biraq bizdiń urpaq Beısekeńniń eńbekteri men kitaptarymenen aýyzdanǵan urpaq», – dep atap ótti. Ǵalymnyń XX ǵasyrdyń basyndaǵy qazaq ádebıeti máselelerin konseptýaldy deńgeıde zerttegenin aıryqsha aıtty.
Saltanatty sharada Beısembaı Kenjebaıulyna arnalǵan eki kitaptyń tusaýy kesildi.