Konserttiń tolyq nusqasy «Almaty» telearnasynan kórsetiledi
Almatyda «Baqyt degen – seniń bala kúnderiń» atty balalar vokaldyq festıvali bastaldy, dep habarlaıdy Almaty-akshamy.kz Almaty.tv-ge silteme jasap.
Bıyl respýblıkalyq baıqaý 6-ret ótkizilip otyr. Birinshi kezeńde qatysýshylar qazaqstandyq óner juldyzdarynyń týyndylaryn, al ekinshi kezeńde sheteldik tanymal ánderdi shyrqaıdy. Olardyń arasynan úzdik shyqqandar erteń gala-konsertte otandyq estrada juldyzdarymen jup bolyp óner kórsetedi. Bul talaby taýdaı talanttardyń jolyn ashýǵa múmkindik beretin televızıalyq joba. Konserttiń tolyq nusqasy aldaǵy demalys kúnderi «Almaty» telearnasynan kórsetiledi.
«Baıqaýdyń basqalardan ereksheligi – realıtı shoý formatynda ótti. Elimizdiń túkpir-túkpirinen jınalǵan qatysýshylar 1 aıdaı Almatyda boldy. Osy ýaqyt aralyǵynda án sabaǵynan qazaqstandyq juldyzdar sheberlik saǵat ótkizdi. Birge qydyryp, kóńildi ýaqyt ótkizdi. Konserttiń qorytyndy kezeńi erteń ótedi», – dedi Qazaqstannyń eńbek sińirgen ártisi Aıjan Nurmaǵanbetova.
Jyl saıyn dástúrli túrde ótetin jobaǵa qyzyǵýshylyq tanytqandar kóp eken. Bıyldyń ózinde elimizdiń ár aımaǵynan 7 myńnan astam ótinim kelip túsken. Kastıng onlaın uıymdastyrylypty. Olardyń ishinde erekshe daýysymen kózge túsken 11 bala irikteýden ótti.
«Semeı qalasynan keldim. Ónermen aınalysyp júrgenime 7 jyl ýaqyt boldy. Meniń búgingi oryndaıtyn ánim «Qorqyt-qobyz» dep atalady. Bul ánniń stılin Quralaı Meırambekten aldym. Ekinshi óleńim – «Indila Dernière danse», – dedi baıqaýǵa qatysýshy Káýsar Máýlen.