Memorandým kúshine endi, ol qol qoıylǵan kúnnen bastap 12 aı qoldanysta bolady.
Qarjy naryǵyn retteý jáne damytý agenttigi (QNRDA), Almaty ákimdigi, bank ombýdsmeni, bankter jáne qoǵamdyq birlestikter arasynda ıpotekalyq qaryzdar boıynsha jalǵyz turǵyn úıdi satýdy jáne odan halyqtyń áleýmettik osal toptaryn shyǵarýdy toqtata turatyn ózara túsinistik pen yntymaqtastyq týraly memorandýmǵa qol qoıyldy, dep habarlaıdy Almaty-akshamy.kz Tengrinews.kz-ke silteme jasap.
Memorandýmdy ázirleý 2020 jyldyń maýsymynda bastalǵany atap ótildi.
«Memorandýmnyń maqsaty taraptardyń problemalyq bereshekti, onyń ishinde ıpotekalyq turǵyn úı qaryzdaryn/ıpotekalyq qaryzdardy qaıta qarjylandyrý baǵdarlamasynyń sharttary boıynsha qaıta qarjylandyrylǵan bereshekti retteý jóninde sharalar qabyldaýy arqyly HÁOT-qa jatatyn qaryz alýshylardyń (teń qaryz alýshylardyń, kepilgerlerdiń, kepil berýshilerdiń) quqyqtaryn qorǵaý», - delingen QNRDA habarlamasynda.
Memorandýmǵa sáıkes, qıyndyqtary bar qaryzdy retteý kezeńinde bankter mynany toqtata turady: sot isin júrgizý, qaryzdy óndirip alý úshin atqarýshylyq jazbany jasaýǵa notarıýsqa júginý, bank balansyna qabyldanǵan jalǵyz turǵyn úıdi satý, qaryz alýshylardy turǵyn úıden shyǵarý, onyń ishinde banktiń balansyndaǵy osy turǵyn úıdiń burynǵy ıelerin shyǵarý.
Aıta keteıik, bul mindetti memorandým emes.
«Taraptardyń árqaısysy memorandýmnyń izgi nıet aktisi ekenin rastaıdy jáne taraptardyń belgilengen maqsattarǵa qol jetkizý úshin adal yntymaqtasýǵa degen ózara nıetin bildiredi jáne azamattyq quqyqtar men mindetterdi belgileıtin shart nemese ózge qujat retinde túsindirilmeıdi», - delingen qujatta.
Memorandým kúshine endi, ol qol qoıylǵan kúnnen bastap 12 aı qoldanysta bolady.
Buǵan deıin Almatyda bolǵan atystan soń qaryz alýshylardy úıinen shyǵarý máselesi belsendi talqylana bastaǵan bolatyn. Eske salaıyq, 20 qyrkúıekte Almatynyń Aqbulaq shaǵynaýdanynda er adam bes adamdy atyp óltirdi, olardyń arasynda polıseıler, sot oryndaýshysy jáne qarapaıym turǵyndar bar. Ol úıden shyǵarý týraly sot sheshimin oryndaýǵa kelgen adamdarǵa oq atqan.