Azamattyq qarýdyń jeke ıelerine, qyzmettik qarýy bar kúzet uıymdaryna, qaladaǵy mamandandyrylǵan dúkenderge 30 myńnan astam tekserý júrgizildi.
Quqyq buzýshylyqtardyń aldyn alý, sondaı-aq tirkelgen qarýdy qoldana otyryp qylmys jasaý derekteriniń aldyn alý maqsatynda Almaty qalasy polısıa departamentiniń Azamattyq jáne qyzmettik qarý aınalymyn baqylaý bólimi menshik ıeleri men paıdalanýshylardyń azamattyq jáne qyzmettik qarýdy, onyń ishinde arnaıy jarǵylyq mindetteri bar zańdy tulǵalardy, qarý aınalymy talaptaryn saqtaýyna tekserý júrgizip jatyr, dep habarlaıdy Almaty-akshamy.kz Polisia.kz-ke silteme jasap.
«Osyndaı is-sharalar barysynda polısıa qyzmetkerleri qarýdy saqtaý jaǵdaılaryn, bekitilgen seıftiń bar-joǵyn, kúzet dabylynyń jumys istep turǵanyn, qarýdyń ózin, qarýdyń nómirlerin ony saqtaýǵa jáne alyp júrýge ruqsat etilgen nómirlermen sáıkestigin tekseredi. Sonymen qatar qarý ıelerimen jáne paıdalanýshylarmen qarýdy saqtaý erejelerin qatań saqtaý, ruqsattardyń qoldanylý merzimin saqtaý, sondaı-aq qarý-jaraq salasyndaǵy quqyq buzýshylyqtar úshin ákimshilik jáne qylmystyq jaýapkershiliktiń dárejesi týraly túsindirý jumystary júrgizilip jatyr, – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.
Spıkerdiń aıtýynsha, qabyldanǵan sharalarǵa qaramastan, keıbir azamattar qarý men oq-dárilerdi saqtaý erejelerin, olardy tirkeý jáne qaıta tirkeý tártibin de buzyp jatady. Búgingi tańda polısıa qyzmetkerleri 1250 qarý ıesiniń, onyń ishinde 20 zańdy tulǵanyń zań buzýshylyqtaryn anyqtady. – Buzýshylyqqa jol bergeni úshin kórsetilgen qarý ıeleri qoldanystaǵy zańnamaǵa sáıkes ákimshilik jaýapkershilikke tartyldy. Quqyq buzýshylyqtar úshin salynǵan jáne óndirilgen ákimshilik aıyppuldar somasy 29 mıllıon teńgeden astamdy qurady. Bir jyl ishinde birneshe ret zań buzýshylyqqa jol bergeni úshin tórt jeke menshik ıesine jáne bir zańdy tulǵaǵa qarýdy saqtaýǵa jáne alyp júrýge ruqsat qaıtaryp alyndy, – dedi Qulbaev.