Apparatty jergilikti mamandar óz kúshterimen jınap shyǵarǵan.
Qubyrjoldardy zertteý úshin ekologıa jáne qorshaǵan orta basqarmasynyń mamandary joǵary aıqyndyqtaǵy kameramen jabdyqtalǵan jáne tómengi jıilikte jumys jasaıtyn, qashyqtan basqarylatyn robotty paıdalana bastady, dep habarlaıdy Almaty-akshamy.kz
Dóńgelektiń kómegimen jyljıtyn kishigirim robot qoljetimsiz jerlerden ońaı ótip, sol jerdegi beıneni tikeleı arnaıy monıtorǵa shyǵarady. Sonymen qatar apparat telemetrıa málimetterin ıilý buryshy men tik kúıinde de kórsetedi. Qurylǵynyń kómegimen lastaný deńgeıimen qatar qubyrdaǵy korozıa, jarylý jáne t.b. aqaýlaryn anyqtaýǵa bolady.
Qazirgi kezde qala ákimdigi aryq jelisin qalpyna keltirip, olardy kolektorlarmen baılanystyrý jumystaryn júrgizip jatyr. Sonymen qatar aryq jelileriniń sýarý múmkindigin de qalpyna keltirý qolǵa alynǵan. Aryq jelilerin jóndeý jáne qaıta qurý jumystary boıynsha tıisti jobalaý esepteý qujattamasy ázirlendi. Keıbir jerlerde aryq jelilerin keńeıtý josparlanǵan.
Qalada tyǵyz qurylystyń júrgizilýine baılanysty aryq jelisin salýǵa múmkindik joq jerlerde sý basýdy boldyrmaý úshin sý aǵynyn bólý jumystary júrgizilýde. Jyldyń sońyna deıin 56 sý basý aýmaǵynda kolektor júıesin iske qosyp, aryq jelisimen baılanystyryp, apatty qalpyna keltirý jumystaryn júrgizý josparlanǵan.
Almatyda sý basýdyń negizgi sebebi aryq jelisinde jaýyn jáne erigen qar sýyn ótkizý múmkindiktiń joqtyǵynda jáne kolektor-káriz júıesiniń nashar bolýynda. Qoldanystaǵy kolektorlarǵa kóp jyldan beri tıisti qyzmet kórsetilmegen.
Qalada barlyǵy 16 kolektor bar, onyń 12-i jaramsyz, tórteýi tek 30%-ǵa jumys istep tur. Bıyl jalpy uzyndyǵy 376 km aryq jelisin salý jáne qaıta qurý jumystary bastaldy.