15 maýsymda Almaty qalasynda ótkiziletin Almaty Management University (AlmaU) ýnıversıteti bazasynda alǵashqy sheteldik «Qaınaý núktesi» ashylady
Ol memleket, bıznes jáne sarapshylar qaýymdastyǵynyń ókilderi arasynda pikir men tájirıbe almasý úshin tıimdi dıalog alańyna aınalmaq, dep habarlady Almaty-akshamy.kz QR Ekonomıka mınıstrliginiń taratqan habaryna silteme jasap.
Búgin QR Ulttyq ekonomıka mınıstri Áset Erǵalıevtiń Strategıalyq bastamalar agenttiginiń ókilderimen kezdesýi barysynda taraptar Qazaqstan men Reseı arasynda ınvestısıalyq ahýaldy jetildirý, bıznesti damytý jáne memlekettiń strategıalyq josparlaý máseleleri boıynsha tájirıbe almasý múmkindigin qarastyrdy.
Mınıstr Qazaqstanda ınvestısıa úshin barynsha qolaıly jaǵdaı jasalatynyn atap ótti. «Bizdiń strategıalyq mindetimiz – 2025 jylǵa qaraı sheteldik ınvestısıa kólemin jylyna $30 mlrd-qa deıin arttyrý. Bul negizgi kapıtalǵa salynǵan ınvestısıany 30% deńgeıinde qamtamasyz etýge múmkindik beredi», - dedi Áset Erǵalıev.
Erǵalıevtiń aıtýynsha, qolaıly ınvestısıalyq ahýal qalyptastyrý jáne ınvestısıa aǵynyn yntalandyrý úshin ınvestorlarǵa memlekettik qoldaý sharalary usynylýda: salyq jeńildigi, zattaı grant berý, sondaı-aq qoldaýdyń jańa quraly – memleket pen ınvestor arasyndaǵy barlyq ýaǵdalastyqty zańnamalyq túrde bekitetin Investısıalar týraly kelisim zańnamalyq túrde engizildi.
Óz kezeginde, RF SBA bas dırektory Svetlana Chýpsheva Agenttiktiń memlekettik basqarý jáne ınvestısıa tartý máselesindegi bastamalary týraly baıandap, aǵymdaǵy jyly 15 maýsymda Almaty qalasynda Almaty Management University (AlmaU) ýnıversıteti bazasynda ótkiziletin alǵashqy sheteldik «Qaınaý núktesiniń» ashylýy týraly eske saldy.
«Almatydaǵy «Qaınaý núktesi» memleket, bıznes jáne sarapshylar qaýymdastyǵynyń ókilderi arasynda pikir men tájirıbe almasý úshin tıimdi dıalog alańyna aınalatynyna senimdimin», - dedi S.Chýpsheva.
Qorytyndylaı kele, UEM basshysy ınvestısıalyq ahýaldy jetildirý jáne memlekettiń strategıalyq josparlaý máseleleri boıynsha reseılik tájirıbeni zerdeleýge daıyn ekenin bildirdi.
RF SBA basshysy da Qazaqstannyń memlekettik, jeke sektorymen jáne qoǵamymen berik iskerlik baılanys ornatýǵa múddelilik bildirdi.
Anyqtama: «Jańa jobalardy ilgeriletý jónindegi strategıalyq bastamalar agenttigi» derbes komersıalyq emes uıymy (budan ári - SBA) Reseı Federasıasy Úkimetiniń 2011 jylǵy 11 tamyzdaǵy ókimimen qurylǵan. SBA Reseı Federasıasy Prezıdentiniń jobalyq keńsesi retinde áreket etedi jáne iskerlik ahýaldy jaqsartý, tehnologıalyq damý jáne ınovasıalardy qoldaý, bilim berý jáne kadrlardy daıarlaý, densaýlyq saqtaý jáne áleýmettik qyzmet kórsetý, óńirlik jáne qalalyq damý, jasyl ekonomıka jáne jaýapty týrızm salasyndaǵy júıeli ózgeristerge baǵyttalǵan jobalardy iske asyrady.
«Qaınaý núktesi» - ujymdyq jumys úshin keńistik. Munda kez-kelgen adam Leader-ID qyzmeti negizinde bilim berý men iskerlik is-sharalardy tegin uıymdastyra alady nemese qatysa alady, kásibı qaýymdastyqtarda bilim berip, oqı alady, jobany júzege asyrý úshin top jınap, búkil el boıynsha sarapshylar nemese ınvestorlar taba alady. Qazirgi ýaqytta Reseıde 114 «Qaınaý núktesi» bar.