Almaty polısıasy 600 esirtki resýrsyn buǵattady, – dep habarlaıdy Polisia.kz. Nashaqorlyqtyń aldyn alý – Almaty polısıasy qyzmetiniń ózekti baǵyty. Esirtki qylmysymen kúresýshiler ótken jyly 420 profılaktıkalyq is-shara ótkizgen.
– Azamattar men eriktilerdiń belsendiliginiń arqasynda betbelgi qoıýshylardy áshkereleý, esirtkiniń taralýy týraly aqparat bar graffıtı jazbalardy anyqtaý jáne boıaý boıynsha birlesken jumys jaqsarǵanyn atap ótkim keledi. Ótken jyly barlyǵy 8 myń 540 graffıtı-sýret anyqtaldy jáne boıaldy. Osy sýretterdi salǵany úshin 8 adam qylmystyq jaýapkershilikke tartyldy. Sonymen qatar bizdiń bólimsheniń qyzmetkerleri tyıym salynǵan kontenti bar 597 saıtty buǵattaý úshin aqparat jiberdi. Bul resýrstardyń jastar arasynda tanymal bolýy alańdatady. Sondaı-aq qyzmeti qylmystyq sıpatta bolýy múmkin 5 ınternet-esirtki dúkenin nazarǵa aldyq, – dedi, Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
Sondaı-aq spıker, búginde nashaqorlyq pen esirtki qylmysynyń aldyn alýda kórneki platformalar belsendi túrde qoldanylyp jatqanyn aıtty: 8 metro stansıasynyń 42 monıtorynda jáne qoǵamdyq oryndarda ornalasqan 72 LED-ekranda anonımdi senim telefony (WhatsApp 8-705-549-70-25) bar áleýmettik rolıkter kórsetiledi.