3 jastan 6 jasqa deıingi 18 118 bala mektepke deıingi uıymdarǵa kezekte tur.
Aıta keteıik, megapolıste barlyǵy 919 mektepke deıingi tárbıe men oqytý uıymdary bar, olarda 79 600 bala (194 memlekettik, 725 jeke balabaqsha) bilim alady, dep habarlaıdy Almaty-akshamy.kz
Bul týraly Almaty qalasynyń óńirlik komýnıkasıalar qyzmetiniń brıfıńinde Almaty qalasy bilim basqarmasynyń basshysy Lázzat Jylqybaeva málimdedi.
Spıkerdiń habarlaýynsha, búginde 3 jastan 6 jasqa deıingi 18 118 bala mektepke deıingi uıymdarǵa kezekte tur.
"Osy máseleni sheshý úshin bıyl jergilikti búdjet qarajaty esebinen 6255 oryndyq 80 balabaqsha, onyń ishinde 5395 oryndyq 75 jeke menshik balabaqsha jáne 860 oryndyq 4 memlekettik balabaqsha ashý josparlanǵan. Búgingi tańda 2 630 oryndyq 47 jańa balabaqsha ashyldy, onyń ishinde 300 oryndyq 1 memlekettik balabaqsha jáne 46 jekemenshik balabaqsha bar", - dedi L. Jylqybaeva.
Sonymen qatar, bıyl jekemenshik balabaqshalarǵa jergilikti búdjet esebinen memlekettik tapsyrys boıynsha 5000 orynǵa qarjy bólindi, búgingi kúni 3801 orynǵa jekemenshik balabaqshalarda memlekettik tapsyrys ornalastyryldy. Jalpy memlekettik bilim berý tapsyrysy 40 995 orynǵa 635 jekemenshik mektepke deıingi uıymda ornalastyrylǵan.
Osy sharalardyń nátıjesinde 3 jastan 6 jasqa deıin balalardy mektepke deıingi tárbıe jáne bilimmen qamtý – 93,5% qurady, jyldyń sońyna deıin bul kórsetkishti 95% - ǵa deıin ulǵaıtý josparlanýda.
Budan basqa, 2023 jyldyń qyrkúıeginen bastap memlekettik mektepke deıingi uıymdarda halyqtyń áleýmettik osal toptarynyń otbasylarynan shyqqan 5 myńnan astam bala tegin tamaqpen qamtamasyz etiletin bolady.
Almaty qalasyn damytýdyń 2025 jylǵa deıingi baǵdarlamasyn iske asyrý jónindegi jol kartasy jáne 2030 jylǵa deıingi orta merzimdi perspektıvalardy oryndaý sheńberinde Bilim basqarmasynyń Qalalyq bilim berýdegi jańa tehnologıalardyń ǵylymı-ádistemelik ortalyǵy janynan qalalyq mektepke deıingi resýrstyq ortalyq quryldy. Onyń basty maqsaty balabaqsha tárbıeshilerin ádistemelik súıemeldeý.