12 memlekettik mektepte kúrdeli jóndeý júrgizilýde, 178 mektepte aǵymdaǵy jóndeý júrgizildi.
Almatyda jańa oqý jylynda alǵash ret mektepke 30 146 bala barady, dep habarlaıdy Almaty-akshamy.kz
Bul týraly Óńirlik komýnıkasıalar qyzmetiniń alańynda Almaty qalasy bilim basqarmasynyń basshysy Lázzat Jylqybaeva habarlady.
Brıfıńte sóz sóılegen basqarma basshysy bıyl Qaırat shaǵyn aýdanynda 1500 oryndyq №211 memlekettik mektep ashylatynyn atap ótti. 12 memlekettik mektepte kúrdeli jóndeý júrgizilýde, 178 mektepte aǵymdaǵy jóndeý júrgizildi.
“1-synypqa qabyldaý 1 tamyzda aıaqtaldy. Búgingi tańda 30 146 bala qabyldandy, onyń ishinde jekemenshik mektepterge baratyn – 3 789 bala. Orta bilim berý uıymdarynda pándik kabınetterdiń 75,6% jańartyldy. Mektepterde barlyǵy 847 pándik kabınet (hımıa, fızıka, bıologıa, onyń ishinde 640 kabınet zamanaýı jabdyqtarmen (jańa modıfıkasıamen) jaraqtandyryldy, sonymen qatar 75 STEM jáne robototehnıka kabınetteri satyp alyndy”, - dedi L. Jylqybaeva.
Sondaı-aq, ol jan basyna shaqqandaǵy qarjylandyrý aıasynda taǵy 147 kabınet, onyń ishinde: 34 hımıa, 31 fızıka, 39 bıologıa, 23 STEAM jáne 20 robototehnıka satyp alynǵanyn, bul jaratylystaný-matematıkalyq sıkl pánderi boıynsha oqytýdy tájirıbege baǵdarlaýǵa múmkindik bergenin aıtty.
“Osy jyldyń 1 qyrkúıeginen bastap “Mektep avtobýsy” jobasy bastalady. Budan buryn biz mektepke baratyn joly qıyn 1-11 synyp aralyǵyndaǵy balalardy tasymaldaý qajettiligin taldaǵan bolatynbyz. Jalpy tasymaldaý qajettiligi 12500 balany quraıdy. Búgingi kúni 100 mektep avtobýsyn satyp alyndy (syıymdylyǵy 21 oryndyq 50 avtobýs jáne 40 oryndyq 50 avtobýs). Bıyl biz qalanyń 7 aýdanynan 30 mektepten 7 722 balany tasymaldaımyz. Ol úshin tasymaldaý qyzmetterine búdjette 1,4 mlrd. teńge qarastyrylǵan. Ony “AlmatyElektrotrans” júzege asyratyn bolady”, - dep bólisti spıker.
1 qyrkúıekten bastap barlyq avtobýstar balalardy tıisti qaýipsizdik sharalaryn saqtaı otyryp, bekitilgen marshrýttar boıynsha tasymaldaıdy. “Mektep avtobýsy” jobasyn iske asyrý oqýshylardyń ata-analaryna kómektesýge, mektep jasyndaǵy balalardyń qaýipsizdigin arttyrýǵa jáne jol qozǵalysy trafıgine júktemeni azaıtýǵa múmkindik beredi. Sondaı-aq oqýshylardyń qaýipsizdigi maqsatynda mektep avtobýstarynda 279 beınebaqylaý kamerasy ornatyldy.
“Taǵy bir iri joba - Keshendi qaýipsizdik júıesin engizý. Bıylǵy jyldyń sońyna deıin barlyq 214 memlekettik mektepte polısıanyń jedel basqarý ortalyqtarymen ıntegrasıalanatyn “dabyl túımelerimen”, ótkizý júıesimen (týrnıketter), órt qaýipsizdigi júıesimen, beınebaqylaý kameralarymen jabdyqtalǵan Keshendi qaýipsizdik júıesi engiziletin bolady. Bul joba jalpy quny 4,9 mlrd teńge bolatyn úsh jyldyq servıstik model sheńberinde qarjylandyrylady”, - dedi ol.
Sonymen qatar, ekinshi jyl qatarynan qala ákimdigi mektepterdiń 1-4 synyp balalary men halyqtyń áleýmettik osal toptaryndaǵy balalardy tegin tamaqtandyrý jobasyn iske asyrýda. Tegin tamaqpen jalpy qamtý 133 myńnan astam oqýshyny quraıdy (nemese orta bilim berý uıymdarynyń jalpy kontıngentiniń 45,3%). Jalpy 2023 jylǵa oqýshylardy tamaqtandyrýǵa 20,4 mlrd teńge qarastyryldy. Bir kúndik tamaqtanýdyń quny – 800 teńge.
Bıyl “Mektepke jol” respýblıkalyq aksıasy jańa oqý jyly qarsańynda 1 tamyz ben 30 qyrkúıek aralyǵynda “Jaqsylyq jasa” uranymen júrgizilýde.
Basqarmanyń málimetinshe, “Jalpyǵa mindetti oqý” qorynan mektep formasy men keńse kerek-jaraqtaryn satyp alý úshin ár balaǵa 43 myń teńgeden halyqtyń áleýmettik osal toptarynan shyqqan 15 653 myń balanyń ata-analarynyń shottaryna joldandy (673,1 mln tenge). Sondaı-aq, aksıa aıasynda osy sanattaǵy balalarǵa demeýshiler esebinen kómek kórsetiledi. Ol úshin oqý orny boıynsha bilim berý uıymyna ótinish berý qajet.