29 sáýir kúni Almatydaǵy Ulttyq kitaphanada jazýshy, «Alash» halyqaralyq ádebı syılyǵynyń ıegeri Jalǵasqalı Dútmaǵanbetovtyń «1812 jyl: Soǵys jáne Beıbitshilik (Qazaqy nusqa)» atty trılogıasynyń tusaýkeseri ótedi, dep habarlaıdy aqshamnews.kz.
Shyǵarmanyń basty ereksheligi — qazaq tarıhynda kóp aıtylmaı júrgen taqyryptardyń arhıvtik derekter negizinde baıandalýy. Avtor Napoleon áskerin ókshelep qýǵan orys áskeriniń quramynda erlikpen shaıqasqan qazaq sarbazdarynyń erligin tarıhı shynaıylyqpen kórsetedi. Bul soǵysqa jazýshynyń óz babalary da qatysqan. Trılogıada olardyń taǵdyry týraly da keńinen aıtylady: solardyń biri Fransıadan Mıshel esimdi qyzdy alyp kelip, urpaq órbitken. Búginde olardyń urpaqtary áli de boılaryndaǵy fransýz qanymen erekshelenip keledi.
Kitapta arhıvtik qujattarmen qosa, tarıhı fotosýretter de berilgen, onyń ishinde Qulsarydaǵy Mısheldiń beıitiniń sýreti de bar.
Trılogıa alǵash ret qazaq tilinde jaryq kórip, keıin kásibı aýdarmashylardyń kómegimen orys, aǵylshyn jáne fransýz tilderine aýdaryldy. Aýdarma sapasyna erekshe kóńil bólgen avtor Abylaı han atyndaǵy Halyqaralyq qatynastar jáne álem tilderi ýnıversıtetiniń mamandarymen tyǵyz jumys istegen.
«1812 jyl: Soǵys jáne Beıbitshilik» trılogıasy shekteýli taralymmen «Toǵanaı T» baspasynan jaryq kórgen.