Almatyda tuńǵysh ret uly qazaq aqyny, oıshyly jáne aǵartýshysy Abaı Qunanbaıulynyń 180 jyldyǵyna oraı arnaıy ázirlengen «Alashtyń Abaıy» atty teatrlandyrylǵan-konserttik qoıylym kórermenge jol tartty.
Respýblıka saraıynyń sahnasynda qazaq óneriniń maıtalmandary Abaıdyń ólmes óleńderi men ánderin oryndap, sóz, mýzyka jáne horeografıa birtutas kórkem týyndyǵa toǵysty. Bul áserli sahnalyq kóriniske 200-den astam ónerpaz qatysty.
Qoıylymdy Qazaqstan teatr jáne kıno óneriniń ańyzy, KSRO halyq artısi, Qazaqstannyń Eńbek Eri Asanáli Áshimov ashty. Ol Abaıdyń tereń oıly jyrlaryn oqyp, kórermenge syrly sezim syılady. Onymen birge sahnaǵa Tuńǵyshbaı Jamanqulov pen Saıat Merekenov shyǵyp, óner kórsetti. Budan soń «Jańa ǵasyr» teatry men «Saltanat» bı ansambli «Abaı–Toǵjan» atty sahnalyq qoıylym usyndy.
Almaty qalasy Mádenıet basqarmasynyń basshysy Ǵanı Maılybaev atap ótkendeı:
«Almatylyqtar Abaıdyń mereıtoıyna arnalǵan is-sharalarǵa belsene qatysýda. Búgin tańerteńnen bastap Abaı dańǵylynda ornalasqan aqyn eskertkishi mańyna shamamen 5 myń adam jınalyp, onyń ańyzǵa aınalǵan ánderin oryndap, gúl shoǵyn qoıdy. Sol kúni keshke 200-den astam artıs Respýblıka saraıy sahnasynda Abaı Qunanbaıulyna arnalǵan arnaıy teatrlandyrylǵan qoıylym kórsetti. Jalpy, qala ákimdiginiń bastamasymen mereıtoı aıasynda 120-dan astam mádenı is-shara uıymdastyrylyp jatyr», — dedi ol.
Sahnaǵa erekshe áser bergen kórinisterdiń biri «Sensitive» bı teatrynyń nómiri boldy. Estý qabileti nashar ónerpazdar júrek pen qımyl tili arqyly Abaıdyń jyr joldaryn jetkizip, zalda otyrǵan ár jannyń kóńilin tolqytty.
Kórermenderdi sondaı-aq 100 baladan quralǵan «Boztorǵaı» horynyń «Biz – Abaıdyń urpaǵymyz» atty sahnalyq qoıylymy tánti etti.
Sahna tórinde Roza Rymbaeva, Aıgúl Qosanova, Venera Alpysbaeva, «Alataý» dástúrli óner teatrynyń artıseri, «Jetigenshiler», «IL CANTO» ansámblderi jáne basqa da óner ujymdary óner kórsetti. Kórermender «Kózimniń qarasy», «Segiz aıaq», «Aıttym sálem, qalamqas», «Jelsiz túnde jaryq aı» sekildi qazaq mádenıetiniń qazynasyna aınalǵan shyǵarmalardy tyńdady.
Keshtiń sharyqtaý sheginde barlyq qatysýshy men hor «Jelsiz túnde jaryq aı» ánin birlese oryndap, merekeniń maıly núktesin qoıdy. Myńdaǵan kórermen rýhanı muraǵa degen tereń alǵysty, Abaıǵa degen sheksiz qurmetti birge sezindi.