Búgin Almaty álemdik mýzyka arenasynyń bir bóligine aınaldy.
Djennıfer Lopestiń Up All Night atty álemdik týry aıasyndaǵy kópten kútken konserti úshin qalaǵa 8 myńnan asa týrıs arnaıy keldi. Aldyn ala málimetke súıensek, kórermenderdiń úshten biri – álemniń túkpir-túkpirinen kelgen qonaqtar. Bul - Almaty jahandyq mýzykalyq ındýstrıanyń jańa ortalyqtarynyń birine aınalǵanynyń bir kórinisi.
Konsert bıletteri túgeldeı satylyp ketken. Olardy 35-ten asa eldiń turǵyndary satyp alǵan. Eń kóp qyzyǵýshylyq tanytqandar: TMD elderi, Eýropa, AQSH, BAÁ, sondaı-aq Kanada, Túrkıa, Japonıa, Qytaı jáne Ońtústik Koreıa azamattary. Bul sharanyń halyqaralyq deńgeıin kórsetip, Almatynyń aımaqtaǵy jańa mádenı astana retindegi mártebesin nyǵaıtady.
Týrıser qatarynda Qyrǵyzstan, AQSH, BAÁ, Germanıa, Túrkıa, Ulybrıtanıa, Fransıa, Latvıa, Ispanıa, Belarýs, Grýzıa, Ázerbaıjan jáne Aýǵanstannan kelgen qonaqtar bar. Sondaı-aq Kanada, Shveısarıa, Qytaı, Polsha, Saýd Arabıasy, Meksıka, Katar, Fınlándıa, Shvesıa, Danıa, Lıtva, Rýmynıa, Chehıa, Ýkraına, Sıngapýr, Nıderland, Estonıa, Zambıa, Taıland jáne basqa da kóptegen elderden kórermender keldi.
Sheteldik týrıser Almatyda orta eseppen úsh-bes kún bolyp, osy ýaqyt ishinde shamamen 1 500 dollar jumsaıdy. Bul qarajat qonaqúı, meıramhana, kólik, ekskýrsıa, saýda jáne ózge de qyzmetterge ketedi. Mundaı aýqymdy sharalar tek jankúıerlerdi ǵana biriktirip qoımaı, týrızmniń damýyna da serpin berip, Almatynyń mádenı jáne gastronomıalyq astana retindegi ımıjin kúsheıtedi, sondaı-aq qalanyń negizgi ekonomıkalyq sektorlaryndaǵy belsendilikti arttyrady.
Máskeýden arnaıy kelgen Iana esimdi qonaq óz áserin bólisti.
«Bul konsertke kelgenime óte qýanyshtymyn. Qalayńyz tamasha! Kórikti jerleri, taýlary, as máziri keremet! Barlyǵy unady, bul kesh esimde uzaq saqtalady», - deıdi ol.
Almatydaǵy konsert qazaqstandyq jankúıerlerdiń ótinishi boıynsha týr kestesine qosylǵan. Ol qalanyń álemdik mýzyka ındýstrıasyndaǵy jańa ortalyq retindegi mártebesin bekite túsetin mádenı oqıǵa bolmaq.