Almatyda jauyn-shashynǵa baılanysty arnaıy tehnıka kezekshílígí kúsheıtíldí
«Qazgıdromet» RMK málímetínshe, Almatyda 8-10 jeltoqsan aralyǵynda qar aralas jańbyr jauyp, tūman túsíp, jel kúsheıedí, synap baǵanasy kúrt tómendeıdí, - dep habarlaıdy Aqshamnews.kz.
10 jeltoqsanǵa qaraǵan túní qalada 6-9 sm, al tauly aımaqta 15-20 sm qar túsuí múmkín. Tsıklon ótkennen keıín 11 jeltoqsannan bastap jauyn-shashyn toqtap, túngí temperatura –13…–15°S-qa deıín tómendeıdí.
Aua raıynyń būzyluyna baılanysty qalanyń kommunaldyq qyzmetí kúsheıtílgen rejımde jūmys ísteuge kóshtí. Óndírístík bazalarda júrgízushíler, mehanızatorlar men jūmysshylar táulík boıy kezekshílíkke qoıyldy. Būl turaly Almatynyń Kommunaldyq ınfraqūrylym jáne tūrǵyn úı ınspektsıyasy basqarmasynyń ókílderí aıtty.
Táulík boıy 1000-nan astam arnaıy tehnıka men 2,7 myń jūmysshy jūmyldyrylmaq. Eńís, dóń jáne ózge de qauíptí uchaskede taıǵaqty uaqytyly anyqtap, joyu úshín jolǵa patruldík baqylau kúsheıtíldí, barlyǵy 75 jedel brıgada kezekshílík etedí. Almaty qalasynyń Qūtqaru qyzmetíníń 15 tehnıkasy men 50 qyzmetkerí, al Tótenshe jaǵdaılar departamentíníń 53 tehnıkasy men 244 mamany kezekshí boluǵa daıyn.
Sonymen qatar qala ákímdígínde, audan ákímdíkterínde, Kommunaldyq ınfraqūrylym jáne tūrǵyn úı ınspektsıyasy basqarmasynda, «Almaty Tazalyq» kásípornynda jáne merdíger ūıymdarda jūmysty baqylau boıynsha táulík boıy kezekshílík ūıymdastyryldy. Qar jauǵanǵa deıín negízgí magıstraldarǵa kóktaıǵaqqa qarsy qospalardy aldyn ala sebu josparlanǵan.
Kóktaıǵaq kezínde júrgízushílerge jazǵy dóńgelekterdí qysqyǵa auystyru, jyldamdyqty tómendetu, qashyqtyqty saqtau jáne shūǵyl būrylmau ūsynylady. Tájírıbesí az júrgízushíler múmkíndígínshe qoǵamdyq kólíktí paıdalanǵany dūrys. Júrgínshílerge taıǵaq trotuarda barynsha saq bolyp, bıík ǵımarattardyń mańyna jaqyndamau qajet, shatyrdan qar túsu qaupí bar. Qala tūrǵyndaryna joldaryn aldyn ala josparlap, jyly kıínu ūsynylady.