Ortalyq kommunıkatsıyalar qyzmetíníń alańynda Su resurstary jáne ırrıgatsıya mınıstrlígí Su resurstaryn retteu, qorǵau jáne paıdalanu komıtetíníń tóraǵasy Seıílbek Nūrymbetov su nysandaryn qorǵau sharalary, zańsyz su alu faktílerímen kúres nátıjelerí jáne su tasqynyna qarsy ís-sharalar jónínde aıtty, - dep habarlaıdy Aqshamnews.kz.
Aldaǵy su tasqyny kezeńíne daıyndyq sheńberínde komıtettíń basseındík su ınspektsıyalary gıdrotehnıkalyq nysan ıeleríne su tasqynyn qauípsíz ótkízu úshín qajettí ís-sharalardy júrgízu boıynsha ūsynystar beríp jatyr. Būǵan rekonstruktsıya, jóndeu jūmystary jáne qūrylys-montaj jūmystaryna arnalǵan jobalyq-smetalyq qūjat ázírleu de kíredí.
Qazírgí uaqytta 69 gıdrotehnıkalyq nysanda menshík ıelerí rekonstruktsıya, kúrdelí jáne aǵymdaǵy jóndeu jūmystaryn júrgízíp jatyr. Abaı oblysyndaǵy Shar su qoımasynda jáne Shymkent qalasyndaǵy Aqjar su qoımasynda kúrdelí jóndeu ayaqtaldy. Aqtóbe, Jambyl jáne Batys Qazaqstan oblystarynda 24 nysan jóndeldí.
Kúrdelí klımattyq jaǵdaılarǵa qaramastan, 2025 jylǵy vegetatsıya kezeńíníń qorytyndysy kórsetkendeı, el boıynsha jalpy 1,2 mln gektar egístík alqap suarylyp, su alu kólemí 11 mlrd tekshe metrden asty. Būl kólemníń 98%-y Almaty, Jambyl, Qyzylorda, Túrkístan jáne Jetísu oblystaryna tıesílí. Qazírgí uaqytta elímízdíń ońtústígíndegí su qoımalary su jınau rejımínde jūmys ístep tūr.
Jyl basynan berí sudyń «qara naryǵymen» kúres maqsatynda basseındík su ınspektsıyalary 463 tekserís júrgízíp, onyń nátıjesínde zańbūzushylyqty joyu boıynsha 143 nūsqama beríldí. Sondaı-aq 801 ákímshílík aıyppūl salyndy. Onyń íshínde 346-sy óz betímen su paıdalanǵany úshín.
Jańa Su kodeksín íske asyru maqsatynda komıtet 22 normatıvtík-qūqyqtyq akt ázírledí. Jergílíktí atqarushy organdarmen bírlesíp, eldí mekenderdíń aumaǵyndaǵy su qorǵau aımaqtary men beldeulerín belgíleu jóníndegí ís-sharalar jospary bekítíldí. Qazírgí tańda basseın ınspektsıyalary men ákímdíkter su qorǵau aımaqtary men beldeulerí belgílenuí qajet jerústí su nysandarynyń tízímín jasap jatyr. Tıístí jobalardy ázírleu bastaldy.
Būdan bólek, 2025-2027 jyldarǵa arnalǵan eldí mekenderge jaqyn ornalasqan ózenderdíń su tasqyny qaupí joǵary uchaskelerín qalpyna keltíru boıynsha ís-sharalar jospary ázírleníp, bekítíldí. Tazalau jáne tereńdetu úshín Qazaqstannyń on oblysynda jalpy ūzyndyǵy 815 shaqyrym bolatyn 51 ózen men bír kóldíń uchaskelerí aıqyndaldy.
Komıtet memlekettík su kadastryn ázírlep, jarıya ettí. «Su resurstarynyń aqparattyq-taldau ortalyǵy» KEAQ-men bírlesíp Su resurstarynyń ūlttyq aqparattyq júıesíníń esepterín toltyru jáne qalyptastyru boıynsha jūmys júrgízílíp jatyr.
«Basseındík su ınspektsıyalarynyń materıaldyq-tehnıkalyq bazasy jaqsartyldy. Arnaıy tehnıka men avtokólík parkí jańartyldy. Mınıstrlík pen Germanıyanyń halyqaralyq yntymaqtastyq qoǵamy arasyndaǵy kelísím ayasynda jańa kompyuterlík tehnıka alyndy. On ákímshílík ǵımaratta jóndeu jūmystary júrgízíldí. Būl atqarylǵan sharalar ınspektsıyalardyń tıímdí jūmys ísteuí men olardyń funktsıyalaryn sapaly oryndauyna qajettí jaǵdaı jasady», – dedí Su resurstaryn retteu, qorǵau jáne paıdalanu komıtetíníń tóraǵasy Seıílbek Nūrymbetov.