Astanada tańerteńnen beri aýa-raıy kúrt nasharlap, qalyń qar jaýyp, jol qozǵalysyn qıyndatty.
Astana Polısıa departamentiniń málimetinshe, búgin tańnan beri 93 jol-kólik oqıǵasy tirkelgen, - dep habarlaıdy Aqshamnews.kz.
Júrgizýshilerge jyldamdyq rejımin saqtaý, qashyqtyqty ulǵaıtý, kenet manevr jasamaý jáne jaıaý júrginshi ótkelderi men baǵdarshamdaryna jaqyndaǵanda aldyn ala jyldamdyqty tómendetý eskertiledi.
Sonymen qatar, avtokólik júrgizýshilerine kóliktiń tehnıkalyq jaǵdaıyn baqylaý jáne qysqy shınalardy qoldaný qajettigi eske salynady – olar bolmaǵan jaǵdaıda ákimshilik jaýapkershilik qarastyrylǵan.
"Astana polısıasy jol jaǵdaıyn baqylaýdy jalǵastyryp, mynany eskertedi: joldaǵy qaýipsizdik kóp jaǵdaıda árqaısymyzǵa baılanysty. Saq bolyńyzdar, aýa raıyna baılanysty sapar baǵytyn aldyn ala josparlańyzdar jáne jol qozǵalysy erejelerin saqtańyzdar", – delingen habarlamada.